Монголын төлөө залбир

• Амар тайван, Иох 20:19-22

Хүний амьдралд амар амгалан байдал хамгийн үнэ цэнэтэй. Харамсалтай нь, өнөөгийн амьдралд ийм байдал бүрэн алдагдсан гэлтэй. Бид баян байсан ч ядуу гэж, ядуу байвал баян болох гэж, ажилгүй байвал ажил хайж, ажилтай байгаа нь ажлаа голж, завтай байсан ч завгүй гээд зүгээр тогтож суух чадвараа хэдийн алдсан. Хэн нэгэн байхгүй бол хэн ч биш болчих гээд байгаа тул хэн нэгэн болохын төлөө хамаг байгаагаараа хичээнэ. Амар амгалан байдлыг бүр мартчихсан тул тэнэг эсвэл залхуу, хойрго хүн тийм байдаг гэж туйлширна. Өнөөгийн амьдралд жинхэнэ амар амгалан байдлыг хаанаас хэрхэн олох вэ?

Долоо хоногийн эхний өдөр буюу тэр өдрийн үдэш, шавь нар нь иудейчүүдээс айснаас хаалгаа түгжсэн байв. Гэтэл Есүс ирээд тэдний дунд зогсож, тэдэнд -Амар амгалан та нартай хамт байх болтугай гэв.  Үүнийг айлдаад, Тэр тэдэнд гар, хажуугаа үзүүлэв. Шавь нар нь Эзэнийг хараад ихэд баярлав.  Есүс дахиж тэдэнд -Амар амгалан та нартай хамт байх болтугай. Эцэг Намайг илгээсний адил Би бас та нарыг илгээнэ гэв.  Үүнийг айлдаад, Тэр тэдэн уруу үлээн -Ариун Сүнсийг хүлээн авагтун.

ЭЗЭН Бурхан, жинхэнэ амар амгалан байдал зөвхөн Танд итгэх итгэл, Тантай тогтоосон хайрын харилцаанаас ирдэг тул надад Та тийм агуу итгэлийг хайрлаач. Миний бүх амьдрал Таны мутарт атгаастай, амьд байгаа нь би биш, амжилттай яваа нь миний хүч биш, эрүүл байгаа нь миний биеийн чалх биш харин Таны хайр, нигүүсэл гэдэгт бүрэн итгэж,миний амьдралын өдрүүд Таны өмнө тогтоогдсон, надад өдөрт 24 цаг өгөгдсөн гэдгийг ухаарч, амар тайван амьдарч сурахад минь туслаарай. Амен.

• Есүсмйн үхэл, Лук 23:44-47, 50-53

Дэлхийг нөмөрсөн энэ харанхуй гурван цаг үргэлжилсэн байна. Энэ үед Бурхан хүн төрлөхтний гэм нүглийг цагаатгахын тулд Есүсээс нүүр буруулан, Түүнийг загалмай дээр ганцааранг нь орхижээ. Гэмийн уучлалын тэмдэг бол сүм доторх Бурханы ариун оршихуйг гэмт хүнээс тусгаарлаж байсан хөшиг урагдсан явдал байв. Тэгээд олон зуун жилийн өмнөөс хэлэгдсэн ёсоор Есүс Христ гэмт хэрэгтэн мэт үхсэн ч, баян хүний ёсоор урьд нь хүн тавьж байгаагүй хадан булшинд оршуулагджээ. Есүсийн үхлийг хараад итгэсэн Ромын зуутын дарга үнэхээр еөрөөлтэй!

Энэ нь зургадугаар цагийн орчим байсан бөгөөд есдүгээр цаг хүртэл бүх газрыг харанхуй нөмрөв. Нар халхлагдаж, сүмийн хөшиг хоёр хэсэг болон урагджээ. Есүс -Аав аа, Таны гарт Би сүнсээ даатгая гэж чанга дуугаар хашхирлаа. Үүнийг хэлээд Тэр амьсгалаа хураав. Энэ үйл явдлыг харсан зуутын дарга Бурханыг магтан -Энэ хүн үнэхээр гэмгүй хүн байжээ гэв. Үзэгтүн, Зөвлөлийн гишүүн Иосеф гэгч сайн, зөвт нэгэн байв.  Иосеф иудейчүүдийн хот болох Ариматын хүн байсан бөгөөд Бурханы хаанчлалыг хүлээж байжээ. Тэр хүн Пилатад бараалхаж Есүсийн цогцсыг гуйв. Тэгээд цогцсыг нь буулган авч, маалинган даавуунд ороож, хад ухаж бэлтгэсэн булшинд тавив. Тэнд шарил ер тавьж байгаагүй ажээ.

Бурхан Аав аа, гэмт хүн төрөлхтний төлөө Өөрийн Хүүг золиос болгосон Таны агуу хайрыг тань үнэхээр биширч байна. Гэмтэй намайг Өөртөө хүлээн авхын тулд Танд үүнээс өөр сонголт байгаагүй тул ямар хэцүү байсныг би төсөөлж ч чадахгүй байна. Энэхүү хайранд тань би бүх амьдралаараа Танд өртэй. Зөвхөн ийм агуу хайр л мөхөс намайг ингэж албадаж чадна. Таны хайр надад Таныг бас дэргэдээ байгаа хүмүүсээ хайрлаж сурахад минь тусалдагт баярлалаа. Халелюя!

• Есүсийн гэр бүл, Иох 19:25-27

Есүс айлын ууган хүүгийн үүрэг хариуцалагаа биелүүлсээр иржээ. Тэр аавынхаа ажил мэргэжил болох мужааны ажлыг залгамжлан хийж байгаад цаг нь болоод Бурханы өгсөн үүрэг даалгаврыг гүйцэтгэсэн юм. Тэр мөн аавынхаа дараа бэлэвсэн ээжийгээ харж, асарч халамжилж байв. Хүний амьдралын сүүлчийн үйлдлүүдээр тухайн хүний амьдралын зорилго, эрхэм зүйлсийг тордорхойлж болно гэдэг. Есүсийн хувьд ар гэрийнхээ өмнө хүлээсэн үүрэг хариуцлагаа хэзээ ч орхигдуулаагүй.

Харин Есүсийн загалмайн дэргэд Есүсийн эх, мөн нагац эгч нь болон Клопын эхнэр Мариа бас Магдалын Мариа нар зогсож байсан юм. Есүс эхийгээ болон хайртай байсан шавиа ойр зогсохыг хараад, эхдээ -Эмэгтэй, энэ бол таны хүү гээд,  өнөөх шавьдаа -Энэ бол чиний эх гэж айлдав. Тэр цагаас хойш тэр шавь нь Есүсийн эхийг гэртээ аваачив.

Бурхан Аав аа, надад энэ амьдралд аав ээж, ах эгч, дүүсийг өгсөнд баярлалаа. Энэ дэлхийд амьдарч байхдаа гэр бүлийнхээ өмнө хүлээсэн үүрэг хариуцлагаа сайн гүйцэтгэхэд минь туслааарай. Би пастор эсвэл хэн нэгэн чухал хүн байхаас илүү хүний хүү, нөхөөр, аав хүн гэдгийг надад үргэлж сануулж байгаарай. Таны надад өгсөн гэр бүлийг өөрийн дур сонирхол, хүсэл мөрөөдөл, нэр төр, амжилт ололтоос илүүд үзэж, насан туршдаа болзолгүй хайрлах хүч чадлыг гуйж байна. Амен.

• Есүс хаягдсан, Мат 5:46-47

Есүсийн ганцаардал бол бидний ойлгодог ганцаардал байгаагүй. Түүний ганцаардал бол хаягдал, гологдол, ичгүүр, зовлон, гэмийн шийтгэл бүхий загалмайн үхэл байсан юм. Түүнд ямар ч буруу байгаагүй байхад Тэр ийнхүү хаягдсан нь бидний төлөө байсан юм. Яагаад гэвэл бид гэм хийснийхээ төлөө ингэж Бурханаас үүрд тусгаарлагдах байсан боловч Есүс ямар ч гэмгүй байсан атлаа бидний өмнөөс гэмийн шийтгэлийг эдэлсэн юм. Энэ бол туйлын ариун Бурханы хувьд гэмт хүмүүсийг Өөртөө хүлээн авах цорын ганц зам байв.

Зургадугаар цагаас есдүгээр цаг хүртэл бүх газрыг харанхуй нөмрөн авлаа.  Есдүгээр цагийн орчим Есүс чанга дуугаар
-Ели, Ели, лама сабахтани? гэж хашхирлаа. Энэ нь “Бурхан минь, Бурхан минь, юунд Та Намайг орхив?” гэсэн үг аж.

Есүс ээ, миний ял шийтгэлийг загалмай дээр үүрч, намайг Бурханы өмнө бүрэн цагаатгаж, мөнхийн шийтгэлээс чөлөөлсөнд баярлалаа. Одоо би уучлагдсан учраас өнгөрснөө мартаж, шинэ итгэлийн амьдралаар буруутгал, санаа зоволгүй амар тайван амьдарч байгаадаа Танд талархаж байна. Үлдсэн амьдралынхаа турш Тантай харилцаатай байж, Таны Амьд Үгсээр удирдуулж, Ариун Сүнсний хүч чадлаар ариун амьдрахад минь туслаарай гэж би залбирч байна. Амен.

• Есүстэй хамт, Лук 23:43

Бурхан ямар ч гэмтэй хүнийг өршөөж, хэзээ ч Өөртөө хүлээн авахад бэлэн. Харамсалтай нь хүмүүс Есүстэй хамт цовдлогдсон гэмт хэрэгтэн аврагдсан юм чинь би сайхан дураараа амьдарч байгаад амьдралынхаа төгсгөлд Бурханаас өршөөл гуйгаад аврагдана гэдэг. Тийм боломж олдохгүй бол яана? Нөгөө гэмт хэрэгтэн шиг зүрх сэтгэл нь хатуурч, Бурханы хайр, уучлалыг хүлээж авах чадваргүй болвол яана. Мөнхийн амь ба авралыг хүний хүч чадал ба арга замаар хэзээ ч хүртэх боломжгүй. Бурхан ч  хүний элэг доог болохгүй.

Тэнд өлгөгдсөн гэмт хэрэгтнүүдийн нэг нь Түүнийг доромжилж, -Та чинь Христ биш бил үү? Өөрийгөө, бас биднийг авраач! гэв.  Харин нөгөө нь түүнийг зэмлэн -Чи адилхан ялд унасан атлаа Бурханаас айхгүй байна уу?  Бид үйлдсэн хэргийнхээ төлөө зохих хариуг л авсан. Харин энэ хүн ямар ч буруу юм үйлдээгүй шүү гээд  тэр -Есүс ээ, Та Өөрийнхөө хаанчлалд ирэхдээ намайг санаарай гэв.  Тэгтэл Есүс түүнд -Үнэнээр Би чамд хэлье. Өнөөдөр чи Надтай хамт Диваажинд байх болно.

ЭЗЭН Бурхан минь ээ, мөнхийн амьдралыг чин сэтгэлээсээ эрэн хайж байгаа хүмүүст Бурханд хүрэх Есүс Христийн бэтгэсэн цорын ганц үнэн замыг олж харахад нь туслаарай гэж залбирч байна. Яг одоо жаргалдаа ташуурч, амжилтандаа мансуурч, эрдэж, утга учиргүй наргиж цэнгэж яваа хүмүүсийг Та энэхүү сэрүүн зүүднээс нь сэрээж өгөөч гэж гуйя. Одоо өвчин эмгэг, сэтгэлийн гүн хямралд орж, амьдрах итгэл найдвараа алдсан хүмүүст Өөрийгөө таниулаач. Зовж зүдэрч, өлсөж цангаж, даарч хөрч яяаа Монголчуудыг минь Та Өөрийнхөө хайр, ивээлдээ аваач. Бусдыг хайрлаж, хайрыг амсаж чадаагүй байгаа хүмүүст Өөрийнхөө хайрыг амсуулаач гэж залбирч байна. Амен.

• Сүүлчийн үгс, Лук 23:34

Хүн амьдралынхаа сүүчлийн мөчүүдэд их зүйлийг хэлэхийг хүсэх байх даа. Ямар ч найдваргүй, гарцгүй байсан ч хүн бүр Бурханаас аврал гуйж, хэдэн хором ч гэсэн амьд үлдхийг бодох болов уу. Харин гарцаагүй тохиолдолд хүн хамгийн чухал зүйлсээ л хэлэх байх. Хүний сүүлчийн үгсээр тухайн хүний амьдралыг ерөнхийд нь дүгнэж болох болов уу? Есүсийн хэлсэн сүүлчийн үгс гэмт хүмүүсийг хайж, аврахаар ирсэн Түүний амьдралын зорилгыг бүрэн харуулж байна.

-Аав аа, тэднийг уучлаач. Учир нь тэд юу хийж байгаагаа мэдэхгүй байна гэв.

ЭЗЭН Та миний амьдралд шархдаж, хатуурсан зүрх сэтгэлийг Өөрийн хайр, уучлалаараа уяраан, зөөлөн болгож өгөөч гэж залбирч байна.  Миний зүрх сэтгэлийг уур хилэн, хорсол гомдолд идэгдэж, бэтгэрч хатуурхыг бүү зөвшөөрөөч. Таны агуу хайр, нигүүслээр уучлагдсан гэдгэээ хэзээ ч марталгүй үргэлж санаж явахад минь туслаарай. Өдөр тутмын амьдралдаа эргэн тойрондоо байгаа хүмүүсийг Таны хайраар уучлах шийдвэрийг эргэлзэлгүй цаг алдалгүй гаргаж, уучлалаа үгээр илэрхийлж сурахад минь туслаарай гэж би Есүсийн нэрээр залбирч байна. Амен.

• Миний чин хүсэл,  Фил 3:7-11

Заримдаа надад энэ дэлхийгээс хурдан явж, Христийн байгаа тэр сайхан газар очих хүсэл хүчтэй төрдөг. Би амиа егүүтэх талаар яриагүй гэдгийг ойлгоорой.  Хаяа энэ амьдрал үнэхээр утгагүй санагдах юм. Хамаг хүч чадал, өөрт байгаа бүхнээрээ амьдралын төлөө зүтгээд зүтгээд эцэст нь бүх зүйл гарз хохирол болно гэж бодхоор. Гэхдээ хүн эхлээд энэ дэлхийд төрдөг нь Бурханы хүсэл бөгөөд Түүнийг ЭЗЭН Есүс Христээр дамжуулан таньж мэдэхэд оршдог юм байна.

Гэвч миний хувьд ололт байсан бүх юмсыг би Христийн төлөө гарз хохирол болгон тооцов. Тэр ч байтугай, би өөрийн Эзэн Христ Есүсийг таньж мэдэхийн давуу агуу байдлын төлөө бүх юмсыг гарз хохирол болгон үздэг. Би Түүний төлөө бүх юмсын гарз хохирлыг амсаж, тэдгээрийг хог гэж үздэг нь Христийг олохын тулд бөгөөд  Хуулиас гардаг өөрийнхөө зөвт байдалтай биш, харин Христэд итгэх итгэлээр ирдэг, итгэлийн үндсэн дээр Бурханаас ирдэг зөвт байдалтай Түүний дотор би олдохын тулд юм. Ингэхдээ би Түүнийг болон Түүний амилалтын хүч, зовлонгуудын нөхөрлөлийг таньж мэдэн, Түүний үхэлтэй адилхан болгогдож, үхэгсдээс амилуулагдахад хүрмээр байна.

ЭЗЭН минь ээ, би энэ дэлхийд төрж, одоо амьд байгаа нь Таны хүсэл гэдгийг чин сэтгэлээсээ хүлээн зөвшөөрч байна. Би ямар нэгэн тохиолдлоор эхийн хэвлийд олдоогүй, харин Таны гарын бүтээл байсан гэдэгт итгэдэг. Харин одоо энэ амьдралаа сайн дуусгах хүч чадлыг Танаас гуйя. Өдөр бүр Таныг улам илүү таньж, Таны хүссэнээр өөрчлөгдмөөр байна. Одоогийн зовлонгуудаа үүрч, амьдралынхаа бүх ололтуудыг Таны төлөө гарз хохиролд тооцох итгэлийг гуйж байна. Итгэлээр Таны өмнө зөвт тооцогдож, Таны дотор мөнх амьдралд хөл тавьмаар байна. Амен.

• Мөнх амьдрал бий юу? Лук 20:27-40

Яагаад хүмүүс мөнх амьдрал байгаа гэдэгт итгэж, найддаг мөртлөө байдаггүй юм шиг амьдардаг юм бол? Магадгүй үхлээс их айдаг болхоор тэр биз дээ. Миний хувьд Бурханы өвөрт очино гэж итгэдэг боловч хайртай хүмүүсээсээ сална гэж бодхоос айдаг. Эсвэл үнэхээр дахин амилтанд эргэлздэг юм болов уу? Магадгүй зарим нь амьдралдаа үйлдсэн гэмт буруу зүйлсийнхээ шийтгэлээс айдаг байх аа. Миний бодлоор хүмүүс мөнх амьдралд итгэдэгтээ амиа егүүтгэдэггүй, харин энэ амьдрал ямар ч утгагүй бас зорилгогүй, сэтгэл санааны гүн хямаралаас болж тийм үйлдэл хийдэг байх гэж таамаглаж байна. Харин та юу гэж бодож байна?

Амилалт гэж байхгүй хэмээн ярьдаг) садукайчуудын зарим нь Түүн уруу ирэв. Тэд Түүнээс асуун -Багш аа, “Хэрэв хэн нэгний чинь ах үхэхдээ, тэр нь эхнэртэй атлаа үр хүүхэдгүй байсан бол, дүү нь эхнэртэй нь гэрлэж ахынхаа үр удмыг залгуулах ёстой” гэж Мосе бидэнд бичжээ.  Тэгвэл ах дүү долоо байжээ. Ууган нь эхнэр авч, үр хүүхэдгүй үхжээ.  Хоёр дахь нь, гурав дахь нь ч мөн түүнийг авчээ. Ингэсээр ах дүү долуулаа үр хүүхдээ үлдээлгүй үхжээ. Эцэст нь мөнөөх эмэгтэй ч мөн үхэв. Иймд амилалт дээр тэр эмэгтэй хэнийх нь эхнэр болох вэ? Юу гэвэл тэд долуулаа түүнийг эхнэрээ болгон авсан шүү дээ гэжээ. Есүс тэдэнд
-Энэ үеийн хөвгүүд нь гэрлэж, охидоо хадамд гаргадаг. Харин тэрхүү үе хийгээд үхэгсдээс амилалтад хүрэх зохистой гэж тооцогдсон хүмүүс нь эхнэр ч авахгүй, нөхөрт ч гарахгүй. Тэд тэнгэр элч нартай адил тул цаашид үхэж чадахгүй бөгөөд амилалтын хөвгүүд тул Бурханы хөвгүүд юм. Харин Мосе шатаж буй бутны тухай хүүрнэлдээ Эзэнийг Абрахамын Бурхан, Исаакийн Бурхан, Иаковын Бурхан гэснээрээ үхэгсэд амилахыг харуулсан юм. Тиймээс Тэр үхэгсдийн Бурхан биш, харин амьдын Бурхан мөн. Учир нь Түүний хувьд бүгд амьд байдаг гэж айлдав. Хуулийн багш нарын зарим нь -Багш аа, Та сайн хэллээ гэв.  Учир нь тэд Түүнээс юуны ч тухай дахиж асуухыг зүрхэлсэнгүй.

ЭЗЭН минь ээ,  миний зүрх сэтгэлийн гүнд байдаг мөнх амьдрал байгаа гэсэн итгэлийг минь Та хамгаалж өгөөч гэж залбирч байна. Энэ амьдралын ямар ч агуу эрхэм үйлс, эд баялаг, амжилт олот сүнсний минь мэлийг хааж, итгэлийг минь мөхүүлхийг муу нэгэнд бүү зөвшөөрөөч. Хайртай дотны хүмүүс минь ч гэсэн мөнх амьдрах хувь тавилантай гэдэгт чин сэтгэлээсээ итгэж, найдаж явахад минь туслаарай. Үхлийн өмхий хатгуураас айхгүй чөлөөтэй амар тайван амьдрах итгэл, найдвар, хайрын хүч чадлыг би Танаас гуйж байна. Амен.

• Бурханы хүсэл, Лук 22:39-44

Хүн бүр өөрсдийн хүсэл мөрөөдлөө дагаж амьдардаг. Бурханд итгэсний дараа бидний хүсэл мөрөөдөл Түүний хүслийн дагуу өөрчлөгдөх учиртай. Бид сүнсээрээ нялх байхдаа хүсэл мөрөөдлөө биелүүлхийн тулд Бурханыг ашиглахыг оролдож, Есүсийн нэрээр гуйж, шахаж, шаарддаг. Удалгүй Бурхан бидний хүслийг биелүүлэгч шидэт бирд биш гэдгийг биш ухаарч эхэлнэ.Тэгээд бид оюун санаагаар төлөвшиж, итгэлээр өсч Бурхан үнэхээр миний амьдралд надад тохирсон хамгийн сайн зүйлийг хүсдэг гэдгийг харна. Есүс ч гэсэн Миний хүсэл бус, харин Таны хүсэл биелэгдэг гэжээ.

Тэгээд Тэр тэндээс гарч, заншсан ёсоороо Чидун уул өөд өгсөв. Шавь нар ч Түүнийг дагалаа. Тэнд ирээд Тэр тэдэнд хандаж, -Сорилтод орохгүйн тулд та нар залбирцгаа гээд  Тэр тэднээс чулуу шидэх зайтай холдон, өвдөг сөгдөөд ингэж залбирав. -Эцэг минь, хэрэв Та хүсэж байгаа бол энэ аягыг Надаас зайлуулаач. Гэвч Миний хүсэл бус, харин Таны хүсэл биелэгдэг гэв.  Тэгтэл тэнгэрээс тэнгэр элч Түүнд үзэгдэн, Түүнийг тэнхрүүлж байлаа.  Тэр зовж, шаналж байсан тул маш шаргуу залбирч байлаа. Түүний хөлс нь цусны дусал мэт газарт дусалж байв.

Хайртай Аав аа, Та үнэхээр намайг хамгаас илүү хайрладаг учраас миний амьдралд хэрэггүй, надад муу нөлөө үзүүлж, намайг Танаас холдуулах зүйслийг миний хүссэнээр өгдөггүй гэдгийг ухаарч байна. Би чин сэтгэлээсээ, “миний хүсэл биш, хариун Таны хүсэл биелэг” гэж Есүсийн адил залбирч байна. Таны агуу хайр, төгс хүч чадал ба мэдлэг, бас ирээдүйг хардаг мэлмийд тань би өөрийнхөө амьдралыг даатгая. Та миний амьдралыг Өөрийн хүслийн дагуу өөрчилж, Таны сайн төлөвлөгөө төгс биелэгдээсэй гэж би Есүсийн нэрээр залбирч байна. Амен.

• ЭЗЭНд үйлчил, Иох 12:24-26

Бурхан биднийг эхлээд хайрласан тул бид анх цуглаанд ирэхдээ байгаагаараа л ирж, итгэгч ах дүүс нарын хайр, үйлчлэлийг харамгүйгээр хүртдэг. Бурханы хайр ба Түүний Амьд Үгс бидний хатуу, бардам зүрх сэтгэлийг хайлуултал нилээд цаг хугацаа ордог. Энэ хугацаанд бид үйлчлүүлсээр л байдаг. Харин Есүс Христ үйлчүүлхийн тулд биш харин үйлчлэхийн тулд ирсэн гээд, Өөрт нь  итгэдэг хүмүүст Бурхан ЭЗЭНдээ үйлчил гэж сургасан юм.

Үнэнээр, үнэнээр Би та нарт хэлье. Хэрэв улаан буудайн үр газар унаад үхэхгүй бол тэр ганцаараа үлдэнэ. Харин хэрвээ тэр үхвэл олон үр бий болгоно.  Өөрийн амийг хайрлагч хүн түүнийгээ алдана. Энэ ертөнцөд өөрийн амийг үзэн яддаг хүн түүнийгээ мөнх аминд хүртэл хамгаалах болно.  Хэрэв Надад үйлчлэх хүн байвал, Намайг дага. Хаана Би байна, тэнд бас Миний зарц байх болно. Хэрэв хүн Надад үйлчилбэл, тэр хүнийг Эцэг минь хүндэлнэ.

ЭЗЭН минь ээ, Таны надад үзүүлсэн хайр, уучлалын тань хариуд би бүхий л амьдралаараа өртэй тул надад байгаа бүхнээрээ, хамгийн сайнаараа Танд үйлчлэх шийдвэр гаргаж байна. Өөрийн хүч ба ухаанаар бус, харин Таны надад өгсөн Ариун Сүнсний бэлгүүдээр үйлчлэхэд минь сургаарай. Мөн одоо хийж байгаа үйлчлэлдээ золиос бас зориулалттай байхад минь хүч чадал, тэсвэр тэвчээрийг өгөөрэй. Цаашид ямар ч үйлчлэл хийсэн бай хүнд хийж байгаа бус, харин хайртай ЭЗЭН Бурхандаа үйлчилж байгаа гэсэн сэтгэлээр, шагнал нь агуу бөгөөд Мөнхийн улсад хураагдаж байгаа гэсэн итгэлээр, төлөв даруу байдлаар үйлчлэхэд минь туслаарай. Амен.

• Аварлын баясал, Зех 9:9-10

Заримдаа Есүс Христэд итгээгүй байсан бол өөрийнхөөрөө, дурааараа наргиж, дуртай зүйлээ хийж амьдрах байсан даа. Гэтэл одоо Бурхан бас бусад хүмүүс бүгдээрээ намайг харж байгаа болхоор гэм нүглээ нуун, хоёр нүүр гаргаж, худлаа инээж, сайхан дүр үзүүлэх гэсээр хамаг хүчээ бараад байгаа юм шиг санагддаг уу? Христитгэл бол бид нарт мөнхийн амьдрал, жинхэнэ хайр, уучлал нигүүслийг өгч, бид нарыг гэмт хоёр нүүртэй амьдралаас чөлөөлсөн тул бид нарт баяр хөөртэй, байгаагаараа эрх чөлөөтэй амьдрах боломжийг нээсэн. Есүст итгэсэндээ та чин сэтгэлээсээ баярлаж явдаг уу?

Сионы охин оо, үлэмж ихээр баярлагтун! Иерусалимын охин оо! Ялалтын уухай хадаагтун! Үзэгтүн, хаан чинь чам уруу очиж байна. Тэр бол зөв шударга, ялагдашгүй, даруу бөгөөд илжиг унажээ. Илжигний унага болох дудран унажээ. Би Ефраимаас тэргийг нь, Иерусалимаас морийг нь тастана. Дайны нум тастагдана.Тэр үндэстнүүдэд энх тайвныг тунхаглаж, Түүний ноёрхол тэнгисээс тэнгис, Евфратаас газрын мухарт хүртэл орших болно.

ЭЗЭН минь ээ, миний амьдралыг устгаж байсан гэмийн боолчлолоос чөлөөлж, надад сайн сайхан амьдрал бас мөнхийн улсын найдварыг өгсөнд үнэхээр их баярлалаа. Миний төлөө загалмай дээр миний эдлэх ёстой байсан гэмийн шийтгэлийг Өөрийн ариун бие ба цусаараа төлсөнд талархаж байна. Таны хайр уучлал надад үгээр илэрхийлэшгүй жинхэнэ амар тайван, баяр хөөрийг өгдөгт дахин баярлалаа. Намайг хайж олсонд тань чин сэтгэлээсээ баярлаж байна. Надад байгаа энэ аварлын баяслыг үргэлж хамгаалж, бялхам байлгаж өгөөрэй. Амен.

• Тэнгэрлиг хангалт, Марк 11:1-11

Бурхан бидний үндсэн хэрэгцээнүүдийг хангана гэж амласан ёсоороо хангасаар ирсэн, ирээлүйд хангах болно. Ерөнхийдөө Тэр бидний гарын үр жимсээр бидний амьдралд хэрэгцээтэй байгаа зүйлсийг хангадаг бол бидний хүч чадлаас  хэтэрсэн онцгой тохиолдолд Хаанчлалынхаа төлөө Өөрийнхөө арга замаар ер бусын байдлаар хангадаг. Гэхдээ онцгой тохиолдолд бидний хүсэл шунал ордоггүй.

Тэд Иерусалимд, Чидун уулын ойролцоо Бетфаг болон Бетсайдад ойртон иржээ. Есүс шавь нараасаа хоёр хүнийг явуулж, тэдэнд -Эсрэг талд чинь байгаа суурин уруу яв. Тэнд очсон тэр даруй уяатай, хүн хэзээ ч унаж байгаагүй дудранг олно. Уяаг нь тайлаад, энд авчир. Хэрэв хэн нэгэн хүн та нараас “Та нар яагаад ингэж байна?” гэж асуувал “Энэ дудран Эзэнд хэрэгтэй. Удахгүй тэр үүнийг чинь буцааж явуулна” гэж хэлээрэй гэв. Тэд явж, гудамжинд хаалганы гадаа уяатай дудранг олж, уяаг нь тайлав. Тэнд зогсож байсан хүмүүсийн зарим нь -Та нар юу хийж байгаа юм бэ, дудрангаа уяанаас нь тайлж байгаа юм уу? гэхэд, тэд Есүсийн айлдсаны дагуу хэлэхэд хүмүүс тэднийг явуулав. Тэд дудранг Есүс уруу авчраад, дээр нь хувцсаа тохоход Есүс мордов. Олон хүмүүс хувцсаа, зарим нь талбайгаас цавчиж авчирсан найлзуурыг зам дээр дэвсжээ. Өмнө хойно нь явсан хүмүүс хашхиралдан -Хосанна! Эзэний нэрээр Ирэгч нь ерөөлтэй еэ! Бидний эцэг Давидын ирж буй хаанчлал ерөөлтэй. Хамгийн дээдэд Хосанна! Есүс Иерусалимд ирж, сүмд оров. Эргэн тойрноо харсны дараа цаг хэдийн орой болсон тул Есүс арван хоёрынхоо хамт гарч Бетаныг зүглэв.

Бурхан Аав аа, Та Өөрийн Хүү Есүс Христ болон Түүнд итгэж, найддаг хүмүүсийн амьдралын үндсэн хэрэгцээнүүдийг үргэлж итгэмжтэйгээр хангадагт баярлалаа. Та миний амьдралд миний хүч чадлаас хэтэрсэн зүйлсийг онцгой байдлаар хангаж байсанд тань талархаж байна. Та Хаанчлалынхаа хэрэгцээнүүдийг итгэгч нараар дамжуулан хангадаг тул бидний зүрх сэтгэл, сүнсний мэлмий нээлттэй байлгаж өгөөрэй. Амен.

• Шинэ амьдрал, Исая 43:16-21

Египтэд боолчлолоос чөлөөлөгдөж, эрх чөлөөтэй болж шинээр төрсөн Израил үндэстний амьдралд Бурхан цоо шинэ зүйлсийг хийжээ. Хувь хүн ч гэсэн Христэд итгэхээр сүнсээр дахин төрж, амьдрал нь өөрчлөгдөж эхэлдэг. Хүн итгэлээрээ Бурханы гэр бүлд төрж, шинэ амьдралд хөл тавьж, шинэ ах дүүс, шинэ үзэл санаа, шинэ зүйлсэд суралцдаг. Бурхан Өөрт нь итгэдэг хүний амьдралд шинэчлэлийг гаднаас нь биш, дотроос нь хийсээр ирсэн. Тэр таны амьдралд юу хийж байна вэ?

Тэнгис дундуур зам, хүчит их усан дундуур харгуй гаргагч ЭЗЭН ийнхүү айлдав. Тэр тэрэг ба морьд, их цэрэг ба хүчит эрийг гаргаж ирдэг. “Урьдын юмыг бүү дурсагтун. Өнгөрсөн юмыг бүү бодогтун. Үзэгтүн, Би шинэ зүйл хийнэ. Одоо тэр нь бий болно. Та нар үүнийг мэдээгүй гэж үү? Би хээр талд зам тавьж, цөлд гол урсгана. Хээрийн араатнууд, цөөвөр чоно, тэмээн хяруулууд Намайг алдаршуулна. Учир нь Би Өөрийнхөө сонгосон хүмүүсийг ундаалахын тулд зэлүүд нутагт ус өгч, цөлөөр гол урсгав.Өөрийнхөө төлөө Миний бий болгосон ард түмэн нь Миний алдрыг тунхаглана.

Бурхан Аав аа, миний амьдралыг дотроос минь шинэчилж байгаад тань баярлалаа. Та итгэлийн ах дүүс болон амьд үгсээрээ дамжуулан миний зүрх сэтгэл, оюун бодол, амьдралыг үзэх үзлийг минь Өөрийнхөөрөө өөрчилсөөр байгаарай гэж залбирч байна. Миний зүрх сэтгэлийг өөрчлөлт, шинэчлэлтэнд зөөлөн, нээлттэй байлгаж, алив муу нөлөөл, уруу татлага, худал хуурмагаас хамгаалж, надад бие, сэтгэлээ захирах тэвчээрийг суулгаж өгөөрэй. Есүсийн нэрээр, амен.

• Нигүүсэл ба итгэлээр, Гал 5:2-5

Бид анх Есүст итгэхдээ зөвхөн Бурханы нигүүслээр гэм нүглээсээ өршөөгдсөн гэдгийг итгэлээрээ баяртайгаар хүлээн авсан. Харамсалтай нь, удалгүй бид аажим аажимаар шашинлиг болж эхэлдэг. Сүм цуглаанд удаан явж байгаа нь өөрсдийн хүч зорулалт ба тууштай байдал, дээрээс нь Бурханы сүм чуулганы төлөө хийж байгаа сайн үйлчлэлээрээ, мөн хувийн амьдралдаа зөвт байгаагаараа Бурханы өгсөн авралыг алдалгүй, хадгалаад байгаа мэт ойлгож явдаг. Тэгээд сонирхолтой нь итгээд удаагүй байгаа хүмүүсийг хараад болоогүй байна даа, эсвэл Бурханаас холдсон болон гэм нүгэлтэй байгаа хүмүүсийг хараад шүүх хандлагатай болсон байдаг.

Харагтун. Хэрэв та нар хөвч хөндөх ёслолыг хүлээн авбал, Христ та нарт ямар ч тус болохгүйг Паул би хэлж байна. Хөвч хөндөх ёслолыг хүлээн авсан хүн бүрд би дахин гэрчилье. Тэр хүн бол бүх Хуулийг биелүүлэх өртөн мөн. Хуулиар зөвтгөгдөхийг оролдож буй та нар Христээс тусгаарлагдсан ажээ. Та нар нигүүлслээс салан унажээ. Учир нь бид Сүнсээр дамжуулан итгэлээр зөвт байдлын найдварыг хүлээж байна.

ЭЗЭН Бурхан минь ээ, намайг итгээлээрээ зөвхөн Таны нигүүслээр аврагдсан бөгөөд миний бүх амьдрал зуун хувь Таны нигүүсэл, өршөөл хайр дотор байх болно гэдгийг хэзээ ч мартахгүй байхад минь туслаарай. Миний дотор шашинлиг, зөвт байдлаараа бусдыг шүүсэн, өөрийн хүч чадал, сайн үйлсдээ итгэж, найдаж, сайрхах байдлыг хэзээ ч битгий зөвшөөрөөрэй. Таны надад үзүүлсэн хайр, өршөөлийг үргэлж санаж, Тантай дандаа хайрын халуун харилцаатай байхад минь туслаарай. Амен.

• Бурханы амлалтууд, Евр 6:13-20

Итгэгч хүмүүс Бурханы Үгэнд өгөгдсөн амлалтуудыг үргэлж санаж байх хэрэгтэй. Бурхан ирэх мөнх амьдралын баталгаа, Түүний агуу хайр, үл өөрчлөгдөх нигүүсэл, бурханлиг үр удам, мөнхийн ах эгч дүүс, ариун амьдрал, золиос бүхий өргөл, зориулалттай үйлчлэл, зовлон зүдгүүр, үхэл хагацал, хавчлага бүрийг ялан дийлдэг итгэл, найдвар, хайр болон энэ амьдралд хэрэгцээтэй бүхнээр хангана гэж амласан. Сатан болон эдийн шунал,  хуурамч баялаг, худал сургаал, хүсэл тачаал, гэм нүгэл эдгээр амлалтуудыг хүлээн авахад бид нарт саад болоод зогосхгүй, бидний амьдралаас бүрмөсөн хулгайлхыг байнга оролдож байдаг тул бид хамтдаа итгэлээрээ муу бүхнийг эсэргүүцэж, өдөр бүр Есүстэй хамт байх нь чухал.

Учир нь Бурхан Абрахамд амлалт өгөхдөө Өөрөөсөө агуу хэнээр ч тангараглах боломжгүйгээс хойш Өөрөөрөө тангараглаж, “Би үнэхээр чамайг ерөөн адислана. Би чамайг улам олон болгоно” гэж айлджээ. Тэгэхэд Абрахам тэвчээртэй хүлээснээрээ амлалтыг хүртжээ. Учир нь хүмүүс өөрсдөөсөө агуу нэгнээр тангарагладаг бөгөөд тэрхүү андгай тэдний хувьд аливаа зөрчлийг төгсгөх баталгаа нь болдог. Тиймээс Бурхан амлалтыг өвлөгчдөд Өөрийнхөө зорилгын өөрчлөгдөшгүй байдлыг үзүүлэхийг хүсэн андгай өгчээ. Өмнө маань тавигдсан найдварыг барьж авахаар хоргодох газар уруу зугтаагч бид Бурханы хувьд худал айлдах боломжгүй хоёр өөрчлөгдөшгүй зүйлээр дамжуулан хүчтэй урам авахын тулд тэгжээ. Энэхүү найдвар бидэнд сэтгэлийн зангуу мэт байдаг бөгөөд найдвартай ба хөдөлгөөнгүй, мөн хөшиг дотор нэвтрэн ордог.  Мелхизедекийн хэргэмийн дагуу үүрд Тэргүүн Тахилч болж, бидний төлөө урд маань гүйгч адил Есүс тийшээ орсон билээ.

ЭЗЭН, Таны нэр дээр цугларч байгаа хоёр ба түүнээс дээшх хүмүүсийн дунд Та Өөрийн Сүнсээрээ оршиж байгаад тань баярлалаа. Та Өөрийн хүмүүсийг энэ амьдралын бүхийл асуудлуудаар дагуулна, ямар ч нөхцөлд буруутгаж, яллахгүй, хэзээ ч орхихгүй, мартахгүй бас хэрэгцээтэй бүхнээр үргэлж хангана, өвчин зовлон, гай гамшиг болон алив муу бүхнээс хамгаалж, үхлийн хөндийгөөр амар тайван хөтөлж, мөнхийн улсдаа тэвэр дүүрэн хүлээн авна гэж амласанд тань талархаж байна. Эдгээр амлалтуудыг зовлонтой үед минь сануулж, жаргалтай үедээ мартахгүй байхад минь туслаарай. Амен.

• Ариун амьдар, 1 Петр 1:13-21

Хүний гэмт зан чанаруудыг тоолоод баршгүй. Бурхан бид нарыг байгаагаар нь Есүс Христийн ариун цусаар худалдаж авсан болхоор Тэр итгэгч хүнээс ариун амьдралыг шаарддаг. Өөрийн Хүүгийн амийг золиос болгосон Түүнд ийм эрх бий. Тийм ч учраас Христийн сүмүүд хүмүүсийг яг байгаагаар нь хүлээж авдаг ГЭХДЭЭ  хүн огт өөрчлөгдөхгүй, урьдын Баагий хэвээрээ байж болохгүй гэдгийг сануулсан. Яагаад гэвэл Бурхан их золиос төлсөн учраас бүх хүнийг ялгалгүй шүүнэ. Хүн чин сэтгэлээсээ Бурханд итгэвэл  Түүний хүчээр гэмт бодол, үйлдүүдээсээ салж чадна.

Тиймээс та нар оюун санаагаа үйлдэлд бэлтгэж, эрүүл ухаантай байж, Есүс Христийн илчлэлт дээр та нарт өгөгдөх нигүүлсэлд найдвараа бүрэн тавь.  Дуулгавартай хүүхдүүдийнхээ хувьд, мэдэхгүй байхад чинь та нарт байсан урьдын хүсэл тачаалдаа бүү нийцүүл.  Харин та нарыг дуудсан Ариун Нэгэний адил өөрсдийн бүх л зан байдалдаа бас ариун байгтун.  Яагаад гэвэл “Би ариун учраас та нар ариун байгтун” гэж бичигдсэн юм.  Хэрэв та нар ялгаварлалгүйгээр хүн бүрийг үйлсийнх нь дагуу шүүдэг Нэгэнийг Эцэг гэж дууддаг юм бол, дэлхий дээр байх хугацаандаа эмээн биеэ авч яв.   Ингэхдээ та нар эцэг өвгөдөөсөө өвлөсөн өөрсдийн утгагүй амьдралаас алт, мөнгө мэтийн устах зүйлсээр золигдсон бус, харин үнэт цусаар, Христийн цус болох гэм зэмгүй бөгөөд толбогүй хурганы цусаар золигдсон гэдгээ мэдэгтүн.  Учир нь Тэр ертөнц бүтээгдэхээс өмнө урьдаас мэдэгдсэн боловч цаг хугацааны төгсгөлд та нарын төлөө үзэгдлээ.  Та нар Түүгээр дамжуулан Бурханд итгэгчид юм. Бурхан Түүнийг үхэгсдээс амилуулж, Түүнд алдрыг өгчээ. Ингэснээр та нарын итгэл ба найдвар Бурханд байх юм.

Ариун Аав аа, Та миний бүх гэм нүглийг Есүс Христийн ариун цусаар цагаатгаж, намайг Өөрийн хүүхэд болгосонд баярлалаа. Таны Хүүгийн нэрээр дуудагдсан охид, хөвгүүд энэ дэлхийд Таны агуу хайр, уучлалыг ариун амьдралаараа гэрчлэх хүч чадлыг хайрлаач. Хүний амьдралыг ариун болгодог Таны хүч чадалд чин сэтглээсээ итгэж, ариун амьдрах хүсэл зоригийг минь өдөр бүр шинэчилж байгаач. Ариун Сүнс ээ, өдөр бүр миний зүрх сэтгэлийг тогшиж байгаа Амьд Үгсээр миний амьдралыг шинэчилж, ариусгах ажлаа улам хүчтэй хийгээч гэж би Есүс Христийн нэрээр залбирч байна. Амен.

• Христитгэл, Евр 11:1-3

Ямар нэгэн зүйлд итгэх нь хүний зан чанар гэхдээ хэнд, юунд итгэдэг нь чухал. Зарим нь нүдэнд харагдаж байгаа бодит зйлсд илүү итгэдэг бол зарим нь харагдахгүй байгаа зүйлсэд итгэдэг. Ямар ч итгэл үйлсгүй бол ашиггүй, хуурамч, хоосон зүйл болно. Тийм учраас хүн итгэж байгаагаараа амьдрах хэрэгтэй. Христитгэл бол нүдэнд харагдахгүй байгаа Бурхан,  Есүс Христ, Ариун Сүнс, мөнх амьдрал, шүүлтэнд итгэдэг. Ийм итгэлээр амьдарч байсан бодит хүмүүсийн жишээ итгэгч нарыг харагдаж байгаа зүйлсээр бус, харин харагдахгүй байгаа бодит байдалд итгэдэг итгэлээ үйлсээр илэрхийлж амьдрахыг уриалжээ. Таны итгэл ба үйлс тань хэр ойрхон бэ?

Итгэл бол бидний найддаг зүйлсийн бодит байдал, харагдахгүй зүйлсийн баталгаа мөн.  Учир нь урьдын хүмүүс түүгээр гэрчлэлийг хүлээн авсан аж.  Бурханы үгээр ертөнц бүтээгдсэн бөгөөд тийнхүү харагдах зүйлс нь үзэгдэх зүйлсээс бий болгогдоогүйг бид итгэлээр ойлгодог.

ЭЗЭН минь ээ, Та миний зүрхийг шалгаад, хуурамч, хоосон  өөрийгөө хуурсан итгэл байгаа бол надад илчилж өгөөч. Хэрэв өчүүхэн ч гэсэн жинхэнэ итгэл байгаа бол Та хамгаалж, итгэлийг минь өсгөж өгөөч гэж би залбирч байна. Надад итгэлээ үйлдэж амьдрахад минь туслаач. Харагдахгүй байгаа бодит байдлыг итгэлийн нүдээр харж, ямар ч нөхцөлд итгэж, найдаж амьдрах хүч чадлыг Та надад өгөөрэй. Хамгаас илүү энэхүү итгэлээ хуваалцах итгэлийн гэр бүлийг өгсөндтань  баярлалаа. Халелюя.

• Хорвоогийн Гэрэл, Иох 1:1-5

Заримдаа гэмт харанхуй амьдарл итгэгч хүний амьдралыг сүйтгэж, дийлээд байгаа мэт харагддаг. Нэгэн залуугийн амьдралд жинхэнэ гэрэл туссан вм. Тэрээр аавыгаа огт мэддэггүй, учир нь ээж нь нутгийн нэртэй шалиг, энгэр султай эмэгтэй байсам юм билээ. Гэвч түүний харанхуй амьдралд Есүсийн гэрэл тусч, тэр залуугийн амьдрал хүчтэй гэрэлтэж байсныг би харсан. Харамсалтай нь, одоо түүний амьдрал төнөр харанхуйн хүчинд автсан гэлтэй. Тэрээр Христ дотор үхэл биднийг салгатал гээд ханилсан эхнэрээ бяцхан охинтой нь хамт орхиж, шинэ эхнэртэй их хотын хаа нэгтээ алхаж яваа. Миний итгэлээр түүний дотор анх гэрэлтсэн Бурханы Гэрэл унтраагүй байгаа. Яагаад гэвэл харанхуй жинхэнэ гэрлийг дийлээгүй юм.

Эхэнд Үг байсан, Үг Бурхантай хамт байсан ба Үг нь Бурхан байсан. Тэр эхэнд Бурхантай хамт байсан.  Бүх юм Түүгээр бий болсон. Бий болсон юмсаас Түүнгүйгээр бий болсон юмс нэг ч байхгүй. Түүнд амь байсан бөгөөд амь нь хүмүүсийн гэрэл байв. Гэрэл харанхуйг гийгүүлэхэд, харанхуй түүнийг дийлсэнгүй.

ЭЗЭН Бурхан минь, Есүс Христийг  гэмт харанхуй миний амьдралыг гэрэлтүүлхээр энэ дэлхийд илгээсэнд үнэхээр их баярлаж байна. Түүний гэрэл миний амьдралыг гэрэлтүүлхээ болчихвол яанаа гэсэн айдасгүй амьдрах үнэхээр сайхан. Гэвч би өөрөө гэмт харанхуй амьдрал руу гулсаад орчихгүйн тулд Танаас ийм байдлыг надад бүү зөвшөөрөөч гэж чин сэтгэлээсээ залбирч байна. Та миний амьдралын ЭЗЭН гэж тунхаглаж, хүлээн зөвшөөрч байна. Би итгэлээрээ харанхуйн хүч Таны хүүхдүүдийг Танаас булааж чадахгүй гэсэн амлалтанд итгэж байна. Амен.

• Хайрыг өмс, Кол 3:12-17

Хайрыг өмс гэдэг нь Есүс Христийн амьдрал, үхэл ба амилалтаараа харуулсан тийм хайранд суралцхыг хэлсэн байх л даа. Яагаад гэвэд хүнд байдаг бусдыг хайрлаж, хайрлуулах гэсэн төрөлхийн зөн совин бий. Харамсалтай нь, энэ сайхан чанар нь гэм нүглээр бохирдсноос болж хүмүүс хайрыг гол төлөв секс гэж ойлгож, буруу сэдлээр хайрлаж, тэр ч байтугай ашиг, хонжоо харж хайрладаг. Хүний хайр төгс биш бөгөөд тэр ч байтугай атаа хорсол, өс хонзон, үзэл ядалт болж хувирах ньөнөөгийн нийгэмд эрдийн үзэгдэл болсон учраас жинхэнэ хайрыг өмсөх нь мөш чухал.

Тиймээс Бурханаар сонгогдсон, ариун хийгээд хайрлагдсан хүмүүсийнхээ хувьд та нар өрөвч зүрх, энэрэл, даруу байдал, дөлгөөн зан, тэвчээрийг өмс.  Ингэхдээ нэг нэгнээ хүлцэж, бие биеэ уучилж, хэрэв хэн нэгэнд чинь нөгөөгийнхөө эсрэг гомдол байвал та нарыг Эзэн уучилсны адил та нар бас уучил.  Энэ бүгдийн дээр хайрыг өмс. Хайр бол эв нэгдлийн төгс холбоос юм.  Христийн амар тайван та нарын зүрх сэтгэлийг захираг. Үүний тулд л та нар нэгэн бие дотор дуудагдсан юм. Талархагтун.  Бурханд хандаж зүрхэндээ баяртайгаар дуулах сүнслэг дуу, магтуу, дууллууд хийгээд бүх мэргэн ухаанаар та нар бие биедээ заан, бие биеэ сэнхрүүлэн Христийн үг та нарын дотор бялхам орших болтугай. Та нар үг ба үйлсээрээ юу ч хийсэн, Түүгээр дамжуулан Эцэг Бурханд талархал өргөн, бүгдийг Эзэн Есүсийн нэрээр хийгтүн.

Бурхан Аав аа, жинхэнэ хайранд сургаж байгаад тань баярлалаа. Үнэхээр хэцүү юм. Би өөрийн хүч чадлаар хүнийг хайрлаж чаддаггүй ээ яагаад гэвэл миний тэвчээр хүрэхгүй байна. Есүс ээ, загалмайн үхлийг хүртэл тэвчсэн хайрыг тань бодохоор үнэхээр биширч байна. Гэтэл би өчүүхэн зүйлс дээр тэвчээр алдах юм. Намайг Ариун Сүнсээрээ дүүрэн байлгаж өгөөч гэж би Есүсийн нэрээр залбиран гуйж байна. Амен.

• Дайснаа хайрлах, Ром 12:14-21

Хүний нийгэм хөгжиж, хүний ухамсар, боловсрол, аж амьдрал дээшлэх тусам хирээр өс хонзон, өшөө авалт, дайсагнал алга болчихмоор, гэтэл  амь байсаар л байна. Өнөөдөр дэлхий дээр маш олон дайны цэгүүд байна. Энхийн нөхцөлд ч гэсэн амьдарч байгаа олон хүмүүс зүрх сэтгэлдээ дайсагнал, атаа хорсол, өс хонзонтой насыг барсаар байгаа нь харамсалтай. Уучлал, хайрын сургаалыг амьдралдаа хүлээн авч, амар тайван амьдарсан хүн хичнээн байдаг бол?

Та нарыг хавчигч хүмүүсийг ерөө. Ерөө, харин бүү хараа. Баяр хөөр болж буй хүмүүстэй хамт баярла, уйлж буй хүмүүстэй хамт уйл.  Өөр хоорондоо нэг санаатай байцгаа. Ухаан бодолдоо ч бүү ихэрх. Харин төлөв даруу байхыг эрхэмлэ. Өөрөө өөрийгөө мэргэн бүү болго.  Хэнд ч хэзээ ч бузар мууг бузар муугаар бүү хариул. Бүх хүний өмнө юу нь зөв болохыг л харгалзан үзэж бай. Хэрэв боломжтой бол, та нараас шалтгаалж байгаа бол бүх хүнтэй эвтэй байгтун.  Хайртууд минь, хэзээ ч өөрийн өшөө хонзонг бүү ав. Харин Бурханы уур хилэнд зай гарга. Учир нь “”Өшөө авалт нь Минийх, Би буцааж төлнө” гэж Эзэн айлдав” гэж бичигджээ.  “Хэрэв дайсан чинь өлссөн бол түүнийг хоолло. Хэрэв тэр цангасан бол түүнд уух юм өг. Учир нь чи ингэснээрээ түүний толгой дээр галтай нүүрс овоолж байгаа хэрэг”.  Бузар муугаар бүү дийл, харин бузар мууг сайнаар дийлэгтүн.

Ариун Сүнс ээ, Есүс Христийн заасан уучлал, хайрын сургаалыг амьдралдаа хэрэгжүүлж сурахад минь туслаарай.  Хамт амьдарч байгаа эхнэр, хүүхдүүд болон Таны надад өгсөн хүмүүсийг Тан шиг нөхцөл, болзолгүйгээр хайрлах хүч, тэсвэр тэвчээр, зориулалтыг бас өгөөч. Тэгээд надад дайсагнаад байгаа хүмүүсийг хүртэл хайрлах тийм хүч чадлыг би гуйж байна. Би үүнийг Таны хайр, нигүүсэл, хүч бас тусламжгүйгээр хийж чадахгүй гэдгээ хүлээн зөвшөөрч байна. Яг одоо өс хонзон, өшөө авалтанд хүлэгдсэн Таны охид, хөвгүүдийг чөлөөлж өгөөч гэж би Есүс Христийн нэрээр залбирч байна. Амен.

• Ах дүүсийн хайр, Ром 12:9-13

Хүн Есүст итгээд Бурханы гэр бүлд орж, шинэ хүмүүстэй ах дүүсийн харилцаатай болж эхэлдэг. Хувь хүний хувьд энэ харилцаа адилхан түвшинд байдаггүй. Харин ийм харилцаа хэр хурдан хөгжих нь тухайн сүмийн итгэгчдийн жинхэнэ итгэлээс шууд хамааралтай. Тухайн хүмүүсийн итгэл хоёр нүүртэй, хуурамч байвал, эсвэл гэм нүгэлтэй найзан дундаа байдаг, ЭЗЭНд үйлчилдэггүй зүгээр үйлчилгээ авсан үйлчлүүлэгчид байж найдвар, тэвчээр, залбирал, хандив, зочлол байдаггүй бол энэ харилцаа нэр төдий хүйтэн хөндий хэвээр байх болно.

Хайр нь хоёр нүүргүй байг. Бузар мууг жигш, сайнаас зуурч ав. Ах дүүсийн хайраар бие биеэ хайрла. Бие биеэ өөрсдөөсөө дээгүүр дээдлэн хүндэл.  Хичээл зүтгэлд бүү хойрго бай. Эзэнд үйлчлэн сүнс дотор шат.   Найдвар дотор баярла, зовлон дотор тэвчээртэй бай, залбиралд өөрсдийгөө зориул,  ариун хүмүүсийн хэрэгцээнд хандив өргө, зочломтгой бай.

ЭЗЭН минь ээ, би бүх Монгол чуулганууд Таны жинхэнэ хайрын үр жимсүүдээр дүүрэн байхын төлөө залбирч байна. Мөн энэ залбирлыг надтай хамт  өргөж байгаа итгэгч хүн бүрийн амьдралд энэ хайрын үйлс бас үр жимсүүд үнэхээр их байх болтугай гэж тунхаглаж байна. Бидний зүрх сэтгэлийг татсан энэ хайр шинээр итгэж байгаа хүмүүст маш их хэрэгтэй гэдгийг бид нарт үргэлж сануулж байгаарай.  Энэ хайрыг бусдаас нэхэлгүй харин итгэлийн ах дүүс нартай хуваалцаж, хамтдаа суралцахад минь туслаарай. Амен.

• Амьд, ариун өргөл, Ром, 12:1-2

Итгэгч нар Бурханы төлөө юу хийснээрээ өөрийнхөө болон бусдын амьдралыг дүгнэн, шүүх хандлагатай байдаг. Жишээ нь, би 93 онд Библийн сургуулд орчихоод Бурханы төлөө сурж, сүмд нь үйлчилж, хандив өгч байгаа тул Түүнд таалагдаж байгаа, тийм ч учраас Тэр намайг ивээгээд байна гэж ойлгож билээ. Харин Бурхан огт өөр зүйлийг хүсдэг. Тэр бид нарыг бүх амьдралаа Түүнд таалаамжит амьд, ариун өргөл болгохыг хүсч  байдаг. Бүх амьдралаа Бурханд өргөсөн хүн ямар ч үйлчлэлийг гололгүй, бас гоморхолгүй  хийж, Бурханы сүмд аравнаы нэгээ баяр хөөртэйгээр өргөж чадна.

Иймд ах дүү нар аа, өөрсдийн биеэ Бурханд тааламжит амьд, ариун тахил болгон өргөхийг Бурханы өршөөлөөр та нараас хичээнгүйлэн гуйя. Энэ нь та нарын сүнслэг мөргөл мөн. Энэ үеийн явдалд бүү нийцэгтүн. Харин зүрх сэтгэлээ шинэчилснээр өөрчлөгдөж Бурханы хүсэл юу болохыг, тухайлбал сайн, тааламжит, төгс төгөлдөр хүслийг батлагтун.

Бурхан Аав аа, би байгаараа Таны тааллыг олж, хайрыг тань хүртэж байгаадаа чин сэтгэлээсээ талархаж байна. Та надаас зөвхөн өргөл ба үйлчлэлийг авч намайг ашиглахыг хүсдэггүй, харин надтай бүх амьдралын минь турш харилцаатай байхыг хүсдэгт баярлалаа. Та Өөрийнхөө Хайр ба Амьд Үгээрээ миний зүрх сэтгэлийг өөрчилж байгаа гэдэгт би итгэж байна. Энэ дэлхийд амьдарч байгаа ч бузар муутай нь нийцэхгүй байх хүч чадлыг надад байнга өгч байгаарай. Таны сайн, тааламжит, төгс төгөлдөр хүслийг биелүүлж амьдармаар байна. Амен.

• Есүсийн дуудлага, Исая 42:1-9

Бурханы дуудлага гэхээр итгэгч нар ирээдүйд дэлхийн хаа нэг хязгаарт очоод, Бурханы төлөө ямар нэгэн агуу зүйл хийнэ гэж ойлгодог. Тэгээд би тэнд дуудагдсан, би ийм дуудлагатай, эсвэл би дуудлагаа тодорхой аваагүй байгаа гэж хүлээсээр байдаг. Миний бодлоор, итгэгч хүний дуудлага бол бүх амьдралынхаа турш амьдрач байгаа газраа Есүсийн үйлсийг үргэлжлүүлэх гэж ойлгодог. Бурханы Есүст өгсөн дуудлагыг харцгаая.

Тэнгэрийг бүтээж татаад, дэлхий болон түүний үр жимсийг дэлгэсэн, түүн дээрх хүмүүст амьсгал өгөгч, түүний дотор явагчдад сүнсийг өгөгч Бурхан ЭЗЭН ингэж айлдаж байна.  “Би бол ЭЗЭН. Би чамайг зөвт байдалд дуудсан. Би бас чиний гараас атгаад, чамайг хамгаална. Би чамайг ард түмний гэрээ болгож, үндэстнүүдийн гэрэл болгоно. Энэ нь сохрын нүдийг нээн, гяндангаас хоригдлуудыг чөлөөлж, харанхуйд суугчдыг шоронгоос гаргахын тулд юм. Би бол ЭЗЭН. Энэ бол Миний нэр. Би Өөрийн алдрыг бусдад, Өөрийн магтаалыг сийлмэл хөргүүдэд өгөхгүй. Үзэгтүн, урьдын юмс болж өнгөрнө, эдүгээ Би шинэ юмыг тунхаглаж байна. Тэднийг гарч ирэхээс өмнө Би та нарт мэдэгдэнэ”.

ЭЗЭН Бурхан минь, Таны дуудлагыг өөрийн хүсэл, мөрөөдлөөс ялгажхарах сүнсний мэлмийг нээж, зүрх сэтгэлийг минь зөөлөн, нээлттэй болгооч. Таны Хүүгийн хийсэн үйлсийг үргэлжлүүлж, сургаалаар нь замнаж, дэлгэрүүлж амьдрах хүч чадал ба хүслийг надад өгөөч. Сатаны хууран мэхлэлтийг ялгах чадварыг Өөрийн охид, хөвгүүдэд өгөөрэй гэж Есүсийн нэрээр залбирч байна. Амен.

• Есүс бол Бурхан, Мат 17:1-8

Есүс Христийг дэлхийд төгс золиос болхоос өмнө хүмүүс Бурханы тогтоосон хуулиар зөвтгөгддөг байсан. Хуулийн хатуу шалгуур хүртэл Бурханы хязгааргүй их хайр, өршөөл ба нигүүслийн дотор байсны илрэл бол Мосе ба Элиа хоёр мөн. Тэд бусад хүмүүсийн адил жирийн хүмүүс байсан гэж Библид бичсэн байдаг. Миний бодлоор тэд төгс байж, хуулийн бүх заалтыг чанд биелүүлж чадаагүй атлаа Бурханы хаанчлалд орсон байна. Мосе, Элиа хоёр Есүстэй уулан дээр уулзаж байгаа нь мөнхийн амьдрлын бодит байдлыг батлан харуулж байна.

Зургаан өдрийн дараа Есүс Петр, Иаков болон түүний дүү Иохан нарыг дагуулан хэдүүлхнээ өндөр ууланд гарчээ. Тэр тэдний өмнө хувирч өөрчлөгдөв. Түүний нүүр нар мэт гэрэлтэж, хувцас нь гэрэл мэт цагаан болсон байлаа. Харагтун. Мосе, Елиа нар Түүнтэй ярилцаж байгаа нь тэдэнд үзэгдэв. Петр Есүст -Эзэн, энд байгаа маань бидэнд сайн боллоо. Хэрэв Таныг хүсвэл энд гурван цацар барьж өгье. Нэгийг нь Танд, нэгийг нь Мосед, нэгийг нь Елиад зориулъя гэв. Тийн ярьж байтал харагтун, гэрэлт үүл тэднийг бүрхэн авахад үүлнээс -Энэ бол Миний хайрт Хүү мөн. Түүнд Миний таалал оршдог. Түүнийг сонсогтун гэх дуу гарав. Шавь нар үүнийг сонсоод нүүрээрээ унаж, ихэд айв. Есүс ирж тэдэнд гар хүрч -Бос, бүү ай гэлээ.  Тэд толгойгоо өргөн харахад, Есүсээс өөр хэнийг ч олж харсангүй.

Өнө мөнх амьд оршигч Бурхан минь ээ, би Таны хайртай Хүү, хүн төрөлхтний Аврагч Эзэн Есүс Христийг бүх амьдралаараа дагаж амьдархыг хүсч байна. Та миний сүнсний мэлмийг нээж, сонсох чихийг минь нээлттэй байлгаж өгөөч. Энэ амьдралын олон янзын  шуугиан, яаруу сандруу завгүй амьдрал дунд Таны бичигдсэн Амьд Үгсээс итгэл, найдвар, хайрын амлалтуудыг сонсох сэтгэлийн амар тайван байдлыг надад хайрлаач. Энэ амьдралын жаргал, зовлон дунд сэтгэл алдралгүй, бодит хэрэгцээ болон ирээдүйдээ санаа зоволгүй өдөр бүр, хором болгонд Тандаа итгэж, найдаж явахад минь туслаарай. Амен.

• Үхэл ба амь, Иох 5:19-24

Хэрэв хүн үхэл эсвэл амьтай тулгарах юм бол ямар ч эргэлзээгүй амийг сонгоно. Буурхан энэ сонголтыг хүнд зөвхөн энэ амьдралд хийх боломжийг олгодог байна. Харамсалтай нь, хүмүүс энэ сонголтыг хойшлуулсаар байдаг. Зарим ухаантай хүмүүс хамгийн сүүлчийн мөчид хийчихнэ гэжсанаархдаг. Энэ боломжтой эсэхийг би мэдэхгүй юм даа.

Есүс тэдэнд хандан -Үнэнээр, үнэнээр Би та нарт хэлье. Эцэгийнхээ хийдгийг Хүү нь үзэхгүй бол Хүү Өөрөөсөө юуг ч хийж чадахгүй. Учир нь Эцэг юу хийнэ, Хүү нь бас эдгээр зүйлийг түүнчлэн хийдэг.  Эцэг Хүүгээ хайрладаг бөгөөд Тэр Өөрийн хийж байгаа бүхнийг Түүнд үзүүлдэг. Та нарыг гайхуулахын тулд тэдгээрээс ч агуу ажлуудыг Тэр Түүнд үзүүлнэ. Учир нь Эцэг үхэгсдийг босгон, тэдэнд амь өгдөгчлөн, Хүү нь бас Өөрийн хүссэн хүнд амь өгдөг. Учир нь Эцэг хэнийг ч шүүхгүй, харин Тэр бүх шүүлтийг Хүүдээ даатгасан. Энэ нь бүгд Эцэгийг хүндэлдгийн адил Хүүг хүндлэхийн тулд юм. Хүүг хүндэлдэггүй хүн нь Түүнийг илгээсэн Эцэгийг хүндэлдэггүй. Үнэнээр үнэнээр Би та нарт хэлье. Миний үгийг сонсоод, Намайг илгээгч Түүнд итгэгч нь мөнх амьтай болох бөгөөд яллагдахгүй. Харин үхлээс өнгөрч амь уруу шилжив.

ЭЗЭН минь ээ, би бардам зангаар эсвэл шүүмжилсэн хандлагаар бус, харин чин сэтгэлээсээ энэ сонголтыг итгэлээр хийгээгүй байгаа Монгол хүн нэг бүрийн төлөө залбирч байна. Ар гэр, найз нөхдийн нөлөөн, дарамт шахалтанд уналгүйгээр оройтхоос өмнө энэ сонголтыг хийгээсэй гэж Есүсийн нэрээр залбирч байна. Амен.

• Зайл Сатан аа,  Мат 16:21-23

Хэрэв та Бурхан болон Библид итгэдэг бол Сатан байгаа гэдэгт итгэхээс өөр аргагүй. Сатан бол бусад тэнгэрэлч нарын адил бүтээл бөгөөд Бурхантай харьцуулбал хүч чадал нь их хязгаарлагдмал, тэр нэг цагт нэг л газар байж чадна. Тэр хүний амьдралыг хулгайлж, бусниулж Бурханы эсрэг хандуулхын тулд оршиж байдаг. Тэр өөрт нь үйлчилж байдаг түмэн муу сүнснүүдээр дамжуулан бид нарын оюун бодол, зүрх сэтгэлд байнга сөрөг нөлөө үзүүлж, уруу татдаг тул итгэгч хүн буг чөтгөрт орон зай өгөлгүй, эсэргүүцэж, шаардлагтай үед эрх мэдэлтэй Есүсийн нэрээр зайл гэж тушаах хэрэгтэй.

Тэр цагаас эхлэн Есүс Христ шавь нартаа Өөрийн Иерусалим уруу явах, ахлагчид, ахлах тахилч нар болон хуулийн багш нараас их зовлон амсах, алуулах, гурав дахь хоног дээрээ амилах ёстойгоо илэрхийлж эхлэв. Петр Түүнийг татаж -Эзэн минь, Таныг Бурхан өршөөг. Ийм юм Танд хэзээ ч тохиолдохгүй гэж зэмлэж эхэлсэнд, Тэр эргэж Петрт -Миний араас зайл, Сатан аа! Чи Надад бүдрэх чулуу болж байна. Учир нь чи Бурханы юмыг бус, харин хүнийхийг л боддог гэлээ.

Бурхан минь ээ, намайг Таны Үгээс холдуулж, амьдралаа өөрийн хүчээр авч яв хэмээн байнга уруу татаж байдаг муу сүнснүүдийг ялгаж, тэдний нөлөөнөөс ангид амьдрах  чадварыг өгөөч. Учир нь муу сүнснүүд миний махан биеийн хүсэл тачаал, амархан баяжих гэсэн шунал, өөрийн хүч чадлаар Таны сүмийг амжилттай өсгөөд өөрөө нэр алдартай болчих гэсэн хүслүүдийг минь өөгшүүлж, Таныг үгүйсгэж, энэ дэлхийн хэв маягаар амьдар гэж намайг өдөр бүр ятгадаг. ЭЗЭН минь, Таны адил Сатаны урхийг харж, түүнийг эсэргүүцэж, Таны Үгээр амьдралаа удирдуулсаар ялагчийн барианд амжилттай ороход минь туслаарай. Есүсийн нэрээр, амен.

• Ерөөлтэй хүн, Дуул 84

Энэ дэлхий гэм нүгэлд нэрвэгдсэн хэдий ч хүн өөрөө сайн дураараа хорон муу хүн болдоггүй. Амьдрал зарим хүнийг хорт могой мэт хар санаатай болгосон ч Бурханы хайр тэр хүний хатуурсан зүрх сэтгэлийг зөөллөж, амьдралыг нь өөрчилж чадна. Зарим хүн буг чөтгөрийн нөлөөнд автсан ч тухайн хүн хүсвэл Бурхан түүнийг чөлөөлж бас чадна. Учир нь Бурхан хүнийг Өөрийн дүр төрхөөр бүтээгээд маш сайн гэж их таалсан юм. Улмаар хүн болгоны дотор бүтээгч Бурханы сайн зан чанар бий гэж итгэдэг.  Ийм сайн бүтээгч Бурханд итгэдэг хүний амьдрал ерөөлтэй!

…Өө, Түмэн цэргийн Бурхан ЭЗЭН, миний залбирлыг сонсооч. Өө, Иаковын Бурхан, чих тавин чагнаач.  Хараач, бидний бамбай болсон Бурхан, Өөрийн тосолсон хүний нүүр уруу хараач. Учир нь Таны хашаан дахь нэг өдөр гадна байх мянган өдрөөс ч дээр юм. Би хорон муугийн майхнуудад оршин суухаас Өөрийн Бурханы өргөөний босгон дээр зогсохсон. Учир нь ЭЗЭН Бурхан бол нар болон бамбай юм. ЭЗЭН нигүүлсэл болон алдрыг өгдөг. Тэрээр шулуун шударгаар явагчдаас ямар ч сайн юмыг нуун  дарагдуулдаггүй. Өө, Түмэн цэргийн ЭЗЭН, Танд итгэдэг хүн юутай ерөөлтэй вэ!

ЭЗЭН, би бүх амьдралынхаа турш Таны оршихуй дор орж, ерөөгдмөөр байна. Та Өөрийн гэр бүлийн хүмүүсийн магтаал дунд орших дуртай тул би хаана ч байсан Таны гэр бүлээс холдмооргүй байна. Таны хайр ба үнэнийг надад амьдралаараа зааж, харуулж өгсөн итгэлийн гэр бүлийн ах дүү нартайгаа энэ амьдралын жаргал. зовлонг хамтдаа даван туулмаар байна.  Би бас зөвхөн өөрөө ерөөгдөөд зогсохгүй, ерөөгдсөн амьдралаараа бусдыг дагуулан Таны гэр бүлд оруулах хүсэлтэй байна. Амен.

• Хүний амь ба эд хөрөнгө, Лук 12:13-21

Бид баян болчихвол мөнх амьдрах юм шиг эд хөрөнгний төлөө шунан, өөрсдийн бүх амь амьдралаа зориулж явдаг. Хүн өөрийнхөө амь насыг мөнгөөр худалдан авч болохгүй гэдгийг мэдсээр байж бүхнийг худалдаж авч болох мэт ханддаг нь нууц биш. Библид хүний амь Бурханы гарт байдаг тул амьдралынхаа эрхэм зорилгыг устаж үгүй болох эд хөрөнгний төлөө битгий зориул, харин мөнхөд орших Бурхан болон Түүний төрхөөр бүтээгдсэн хүнийг хайрла гэж сургасан байна. Есүс Христэд ба Библид итгэдэг хүн энэ дэлхийд нэг л удаа амьдарч, амьдралаа шүүлгэхээр Бурханы өмнө зогсоно гэдгийг ухаарч амьдрах хэрэгтэй.

Хурсан олны дотроос нэгэн хүн Түүнд -Багш аа, гэр бүлийн өвийг надтай хуваалц гэж ахад минь хэлээч гэхэд харин Тэр -Хүн гуай, хэн чинь Намайг та нарын шүүгч, хөрөнгө хуваагчаар томилчихсон билээ? гэв.  Тэгээд Тэр тэдэнд хандан -Шуналын алив хэлбэрээс өөрсдийгөө хамгаал, болгоомжил. Учир нь элбэг хангалуун нэгний амь өөрийнх нь өмч хөрөнгөнөөс хамаардаггүй юм гэв. Тэр тэдэнд сургаалт зүйрлэлээр ингэж ярилаа. -Нэгэн баян хүний газар нь маш үржил шимтэй байжээ.  Тэр хүн “Ургацаа хадгалах байр савгүй тул одоо би яадаг билээ?” гэж бодол болж, “Миний хийх зүйл нь энэ юм. Амбааруудаа буулгаад илүү том амбаарууд барья. Тэндээ би хамаг үр тариа, хамаг эд хөрөнгөө хадгална. Тэгээд би сэтгэлдээ “Санаа сэтгэл минь, чамд хожмын олон жилийн турш хэрэглэх хөрөнгө байна. Өөрийгөө амраа, ид, уу, зугаац” гэж хэлнэ дээ” гэсэнд,  харин Бурхан түүнд “Мунхаг чи, яг энэ шөнө амь чинь чамаас нэхэгдэх болно. Тэгвэл чиний бэлтгэснийг хэн эзэмших вэ?” гэж айлджээ.  Тэр хүн өөрийнхөө төлөө эд баялгийг хураагч бөгөөд Бурханы өмнө баян биш болой гэв.

Бурхан Аав аа, миний зүрх сэтгэлээс баян болж байгаад Таныг алдаршуулж, Монголчуудын төлөө их зүйл бүтээнэ гэсэн энэ мунхаг бодлыг минь авч хаяхад туслаач. Үнэндээ хүн өчүүхэн баян болчихоод  Таныг болон Монголчуудыг мартчихдаг гэдгийг би харсаар байж өөрийн эрхгүй баяжих гэсэн шуналд дахин дахин автагдаж, тэгээд Таны төлөө гэж өөрийгөө хуурч явдаг юм байна. Харин надад өдөр бүр Таныг болон Таны надад өгсөн хүмүүсийг хайрлаж, Таны Үгээр дагуулж амьдрахад минь туслаач. Эд хөрөнгөний хуурамч байдлыг олж харах хүчийг надад өгөөч. Одоо байгаа бага юмандаа итгэлтэй, сэтгэл хангалуун байж сурахад минь туслаарай. Амен.

• Бүхий л амьдралаараа, Мат 16:24-28

Итгэл үнэмшлээ амьдралдаа хэрэгжүүлдэггүй хуурамч, хоёр нүүртэй хүмүүс аль ч шашинд бий. Магадгүй хүмүүс шашныг өөрсдийн ашиг сонирхлын төлөө ашигладаг болохоор тэр биз дээ. Эсвэл тухайн нийгэмд хүлээн зөвшөөргдхийн тулд дийлэнх шашныг сонгодог юм болов уу даа. Харин Есүс Өөрийг нь дагахаар шийдсэн хүмүүст бүхий л амьдралаараа дага гэдгийг зааж сургасан. Энэ нь нэр төдий биш, хаяа нэг биш, ганц бие байх үедээ биш харин амьдралынхаа бүх талбарт амьд байх хугацаандаа гэсэн үг юм.

Тэгээд Есүс шавь нартаа -Хэрэв хэн нэг нь Миний араас явахыг хүсвэл, тэр нь өөрийгөө үгүйсгэг. Загалмайгаа үүрч, Намайг дагаг.  Учир нь хэн өөрийнхөө амийг аврахыг хүснэ, тэр хүн түүнийгээ алдана. Харин хэн Миний төлөө өөрийн амийг алдана, тэр хүн түүнийгээ олно. Учир нь хүн бүх дэлхийг олж авсан ч амиа алдвал ямар ашиг байх билээ? Эсвэл амийнхаа оронд юугаа өгөх билээ? Учир нь Хүний Хүү тэнгэр элч нарын хамт Эцэгийнхээ алдрын дотор ирж, хүн бүрд үйлсийнх нь дагуу хариуг өгнө. Үнэнээр Би та нарт хэлье. Энд зогсож байгаа хүмүүсээс зарим нь Хүний Хүүг хаанчлалынхаа дотор ирэхийг харах хүртэл үхлийг үл амсана гэж айлдав.

ЭЗЭН минь ээ, миний амьдралыг Өөр рүүгээ татсаар байгаад тань баярлалаа. Гэмтэй намайг байгаагаар минь нөхцөл болзолгүйгээр хайрласаар байгаа  Таны агуу хайр миний гэмт үйлдлүүд, хүсэл тачаал, ашиг сонирхол харсан өчүүхэн бодлуудыг минь өөрчилж байгааг хараад талархсан сэтгэлээ бүрэн илэрхийлж чадахгүй байна. Харин ганцхан зүйлийг л хүсч байна. Би бүхий л амьдралаараа, бүр амьдралынхаа турш Таныг даган амьдрахыг хүсч байна. Намайг хэзээ ч орхихгүй, мартахгүй гэж амласанд баярлалаа. Амен.

• Бурханаас бүү ич, Марк 8:31-38

Зарим  итгэж бишрэх эрх чөлөөгүй хаалттай орнуудад хүмүүс Есүс Христэд итгэдэг гэдгээ нууж явах шаардлагатай. Тэд нар Библиэ хүртэл нууцаар уншдаг гэсэн. Харин тэд нар баригдхаараа итгэлээсээ ухараагүй тул эрх чөлөөгөө хасуулж, тэр ч байтугай амиа алдсан гэсэн гэрчлэл зөндөө байдаг. Яагаад гэвэл тэд Есүсийн доор хэлсэн зүйлд жинхнээсээ итгэдэг бололтой. Харамсалтай, эрх чөлөөтэй газар амьдарч байгаа хүмүүс итгэл, бишрэлээ хуурамч биш л бол бусдаас нууж явах өөр шалтгаан байхгүй баймаарсан.

Тэр тэдэнд Хүний Хүү их зовох ёстойг болон ахлагчид болон ахлах тахилч нар, хуулийн багш нарт ад үзэгдэж алуулаад гурав хоногийн дараа дахин амилах тухай зааж эхлэв. Есүс үүнийг ил шулуухан айлдсанд, Петр Түүнийг хажуу тийш аваачаад, зэмлэж эхлэв. Гэтэл Есүс эргэхдээ шавь нараа хараад, Петрийг зэмлэн -Сатан, Миний араас тонил. Учир нь чи Бурханы юмыг бус, харин хүнийхийг л боддог гэв.  Тэрээр хурсан олныг шавь нарынхаа хамт дуудаж, тэдэнд хандан -Хэрэв хэн нэг нь Миний араас явахыг хүсвэл, тэр хүн өөрийгөө үгүйсгэж, загалмайгаа барьж Намайг дагаг. Учир нь хэн өөрийн амийг аврахыг хүснэ, тэр хүн түүнийгээ алдана. Харин хэн Миний төлөө, сайн мэдээний төлөө өөрийн амийг алдана, тэр хүн түүнийгээ аварна. Учир нь хүн бүх дэлхийг олж авсан ч амиа алдвал ямар ашиг байх билээ? Амиа сольж авахын тулд хүн юугаа өгөх юм бэ? Завхай, нүгэлт энэ үеийнхэн дотор хэн Надаас болон Миний үгнээс ичнэ, Хүний Хүү ч мөн Эцгийнхээ цог жавхлан дотор ариун тэнгэр элч нарын хамт ирэх үедээ тэр хүнээс ичих болно гэж айлдав.

ЭЗЭН минь ээ, найз нөхөд болон ажлын хүрээнд хүлээн зөвшөөрөгдхийн тулд Танд итгэдэг гэдгээ нууж байгаа итгэгч нарт итгэл, үнэмшлээ нуулгүй амьдралдаа хэрэгжүүлснээрээ гэрчилж явах хүч чадлыг өгөөч гэж Есүсийн нэрээр залбирч байна. Мөн итгэгч хүн бүр өөрийгөө бүрэн үгүйсгэж, бүхий л амьдралаараа Таны араас даган амьдрахад туслаарай. Надад Танаас болон Таны Үгнээс ичихгүй, нууж хаах зүйлгүй сэтгэл амар амьдрах хүч чадлыг өгөөч.  Хожим Таны өмнө айж ичих зүйлгүй зогсохыг хүсч байна. Амен.