Монголын төлөө залбир

• Бурханд ойрт, Евр 4:14-16

Заримдаа танд Бурхантай ойрхон байхад хэцүү байдаг уу? Хэн нэгэн таныг дотроос чинь муулаад та нэг л амар тайван биш, харин ч айдас түгшүүртэй үе гарсан уу? Эсвэл танд өөрийгөө голох сэтгэл хүчтэй төрч, Бурхан таныг зэмлэж, шийтгээд байгаа юм шиг, дээрээс нь бусад итгэгч нарын харц, хандлага таныг буруутгаад байгаа мэт санагддаг уу? Бурхан таны хийсэн гэмийг мэдээд байгаа болохоор танд Түүнтэй ойр байх зохисгүй мэт бодогддог уу? Та алдаа гаргаснаасаа болж үйлчлэлээс чөлөөлөгдөж, тэр ч байтугай цуглаанаасаа хөөгдөж байсан уу? Миний хувьд эдгээр бүх зүйлс тохиолдож байсан гэхдээ Бурханы амьд үгс намайг тэтгэсээр ирсэн юм.

Иймээс тэнгэрт заларсан аугаа Тэргүүн Тахилч болох Бурханы Хүү Есүс бидэнд байгаа тул өөрсдийн хүлээн зөвшөөрдөг итгэлээ бат баримталъя.  Учир нь бидэнд байгаа нь бидний мөхөс байдлыг хуваалцаж чаддаггүй тэргүүн тахилч бус, харин нүгэлгүй атлаа бүх талаар бидэн шиг соригдсон Нэгэн билээ.  Тиймд бид хэрэгцээтэй цагт туслах нигүүлслийг олон, өршөөлийг хүлээн авахын тулд нигүүлслийн хаан ширээнд итгэлтэйгээр ойртон очицгооё.

ЭЗЭН минь, Та загалмайн үхлэл ба дахин амилалтаараа дамжуулан бүх хүмүүст, тэр тусмаа Танд итгэл найдвараа өгч, Таны хүүхэд болсон хэн бүхэнд хэрэгцээтэй цагтаа Таны нигүүслийн хаан шиэрээний өмнө нигүүсэл, өршөөлийг ямар ч буруутгалгүйгээр хүлээн авна гэсэн бат итгэлтэйгээр ойртох боломжийг олгосонд баярлалаа. Би энэхүү хайрыг 18 жил харамгүйгээр хүртэж байгаадаа үнэхээр их талархаж байна. Мөн энэ биеийг орхин, эцсийн амьсгалаа гаргах мөч хүртэл энэ боломж надад байгаа гэж бодохоор Танд чин сэтгэлээсээ талархаж байна. Амен.

• Бусдын алдаанаас суралц, 1 Кор 10:1-13

Бурхан ертөнцийг хайрладаг тул нэг ч хүнийг мөхүүлхийг хүсдэггүй. Есүс Христ хүмүүсийг арьсны өнгө, үүсэл гарал, амьдралын хэв маягаар нь ялгаварладаггүй. Бид хүнийг үйлдсэн гэмт хэргийнх нь төлөө үзэн яддаг бол Есүс тэдний төлөө адил амиа өгсөн тул тэднийг хайрласаар байгаа. Тэр архичин, хар тамхичин, биеэ үнэлэгч, ижил хүйстэн болон бүх төрлийн шашин шүтлэгтэй хүмүүст адилхан боломж олгодог боловч харамсалтай нь хүмүүс өөрсдийн сонголтоо хийсээр байна. Паул тэдний үйлддэг зүйлсийг үйлдэхгүй байхыг итгэгч нарт сануулж байна.

Та нар дараах зүйлийг мэдэхгүй байхыг би хүсэхгүй байна. Ах дүү нар аа, бидний эцгүүд бүгд үүлэн баганан дор байж, бүгд тэнгисийг гатлан гарч, бүгд үүл болон тэнгист Мосе уруу баптисм хүртэж, бүгд адилхан сүнслэг хоол идсэн бөгөөд бүгд адилхан сүнслэг ундааг уусан байна. Тэднийг дагаж байсан сүнслэг хаднаас тэд ундаалсан юм. Тэр хад бол Христ байв. Гэсэн ч тэдний олонх нь Бурханы таалалд нийцсэнгүй. Иймээс ч тэднийг цөлд унагасан юм.  Тэд тачаадан хүссэн шиг бузар юмсын араас бид тачаадан хүсэхгүй байхын тулд энэ нь бидэнд жишээ болсон юм. Тэдний зарим шиг шүтээн шүтэгчид бүү бол. Энэ тухай “Хүмүүс идэж, уухаар суув. Тоглохоор бослоо” гэж бичигдсэн байна. Тэдний адил бид садар самууныг үйлдэхгүй байцгаая. Учир нь тэдний зарим нь садарлаж, ганцхан өдөр хорин гурван мянган хүн үхсэн юм. Тэдний адил бид Христийг сорихгүй байцгаая. Учир нь тэдний зарим нь сорьж, могойнуудад хөнөөгдсөн юм. Тэдний адил бид дургүйцэхгүй байцгаая. Учир нь тэдний зарим нь дургүйцээд, устгагчаар хөнөөгдсөн юм. Энэ бүхэн жишээ болон тэдэнд тохиолдсон бөгөөд үүнийг энэ үеийн эцэст амьдарч буй бидэнд сануулга болгон бичжээ. Тиймээс өөрийгөө зогсож байна гэж боддог хүн уначихгүйн тулд болгоомжтой байг. Та нарт учирсан сорилт нь хүнд тохиолддог л зүйл юм. Бурхан итгэмжит билээ. Тэр та нарыг хэрээс чинь хэтэрсэн хүчээр соригдохыг зөвшөөрдөггүй, харин сорилтыг тэсвэрлэж чадахын тулд сорилттой хамт мөн гарах замыг ч өгдөг юм.

Бурхан минь ээ, хүн төрөлхтний гэмт байдлыг тэвчиж, хүн бүрт гэмших боломж олгосоор байгаа хайрын тань төлөө талархаж байна. Тэр тусмаа миний гэм нүглүүдийг уучилж,  намайг хүлцэн тэвчсээр байгаад тань баярлалаа. Надад төрөлхийн гэмт бузар хүслүүдээ садар самуун үйлдэл болгох боломжийг бүү олгооч. Миний дотор байгаа бусдын гэмт амьдралыг дууриах хүслийг минь Ариун Сүнсний галаар шатааж өгөөч. Надад сануулга болохоор бичигдсэн эдгээр зүйлсийг мартахгүй байхад минь туслаарай. Сорилтонд дунд Таны заасан замаар алхах тэвчээрийг өгөөрэй гэж залбирч байна. Амен.

• Христэч удирдлага, Лук 22:24-30

Хүн удирдлага гэдэг нэрийн дор эрх мэдэл, байр суурь, боловсрол, албан тушаал, эд хөрөнгө гэсэн ойголттой явдаг бөгөөд бусдыг удирдахад эдгээр зүйлс зайлшгүй байх ёстой мэт бодож сэтгэдэг. Харин Есүс Христэд энэ дэлхийн ойлголтоор эдгээр зүйлсийн аль нь ч байгаагүй, Тэр Өөрийн дагалдагч нараа ийм зүйлсээр татаагүй, тэд нарт алиныг нь ч амлаагүй, харин Тэр үйлчлэл, хайр ба нигүүслээр тэднийг удирдсан бөгөөд одоо ч гэсэн Өөрийн Сүмийг ийнхүү удирдсаар байна. Энэ нь сүнслэг удирлага бөгөөд Есүсийн дагалдагч нар ийм байдлаар бусдын удирдахад суралцах хэрэгтэй.

Тэрчлэн тэдний дунд хэн нь хамгийн агуу нь байх талаар ч маргаан дэгджээ. Тэр тэдэнд -Харь үндэстнүүдийн хаад ард олноо ноёрхдог бөгөөд эрх баригчид нь “Буянтнууд” хэмээгддэг.  Харин та нар тийм байж болохгүй. Та нарын дотроос хамгийн агуу нь хамгийн өчүүхэн нь мэт болог, удирдагч нь зарц мэт байг.  Ширээнд тухлагч, үйлчлэгч хоёрын хэн нь агуу вэ? Ширээнд тухлагч нь биш гэж үү? Харин Би та нарын дунд үйлчлэгч мэт байдаг.  Намайг сорилтод байх үед Миний хажууд зогсож байсан нь та нар мөн. Миний Эцэг Надад хаанчлалыг өгсөнчлөн, Би та нарт өгнө. Та нар Миний хаанчлалд Миний ширээнээ идэж уун, Израилийн арван хоёр овгийг шүүн сэнтийд залрах болно.

ЭЗЭН минь ээ, бусдыг удирдан дагуулахад эрх мэдэл, албан тушаал, байр суурь, мөнгө зайлшгүй хэрэгтэй гэсэн бодлоос та биднийг бүрмөсөн чөлөөлж өгөөч. Харин Таны өгсөн хүмүүсийг амжилттай удирдхын тулд хайр, нигүүсэл ба үйлчлэлд өөрөө өсөхийн хирээр амьдралаараа бусдыг удирдаж сурахад минь туслаач. Ариун Сүнс ээ, энэ дэлхийн удирдлага зүйн арга барилуудыг ашиглахаасаа илүү Есүс Хрстийн амьдрал ба Түүний сүнслэг зарчмуудад суралцахад минь миний зүрх сэтгэлийг зөөлөн, оюун бодлыг минь нээлттэй байлгаж өгөөрэй. Амен.

• Хоргодох газар, Дуул 91

Баян ядуу, эрэгтэй эмэгтэй бүх насны хүмүүст эрт орой хэзээ нэгэн цагт сэтгэлийн хоргодох газар хэрэг болдог. Амьдрал хүний хир чадлаас хэтэрсэн ээдрээтэй олон янзын хүнд асуудлуудаар дүүрэн байдаг учраас хүнд итгэл, найдвараа өргөх амьд Бурхан хэрэгтэй. Өнө эртний цагаас хүнд амьдралынх нь үндсэн бодит хэрэгцээнүүд, бие сэтгэлийн аюулгүй амар тайван байдал болон дотоод сэтгэлийн цэвэр ариун байдлыг зөвхөн Амьд Бурхан өгсөөр ирсэн юм.

Хамгийн Дээд Нэгэний халхавчинд оршигч нэгэн Төгс Хүчит Нэгэний сүүдэр дор амьдарна. Би ЭЗЭНд хандан “Миний хоргодох газар, миний бат цайз, Миний итгэдэг Бурхан минь” гэнэ. Тэр Намайг хайрласан учраас Би түүнийг аварна. Тэр Миний нэрийг мэдсэн учраас Би түүнийг өргөмжилнө. Тэр Намайг дуудах бөгөөд Би түүнд хариулна. Саад бэрхшээлтэй үед Би түүнтэй хамт байна. Би түүнийг аварч, хүндлэх болно. Би түүнийг урт амьдралаар хангаж, Түүнд Өөрийн авралыг үзүүлнэ.

ЭЗЭН Та бол миний цорын ганц хоргодох газар, миний итгэл, найдвар бөгөөд миний итгэдэг Амьд Бурхан мөн гэж би тунхаглаж байна. Өдрөөс өдөрт би Таны хайр, уучлал, нигүүслийг улам илүү ухаарч, мэдэрч байна. Та намайг надаас ч илүү сайн мэддэг тул би амьдралаа Таны хүсэл, төлөвлөгөөнд өргөж байна. Миний амьдралын бүхий л жаргалтай, саад бэрхшээлтэй өдрүүдэд Та надтай үргэлж хамт байж, намайг аварсан бөгөөд надад сэтгэлийн хүч өгч байсанд баярлалаа. Та намайг ямар байхаас үл хамааран хэзээ ч орхихгүй, мартахгүй гэсэн амлалтанд тань найдаж байна. Амен.

• Бурханд захирагд, Иак 4:1-10

Хэрүүл, маргаан хийж үзээгүй хэн гэж байхгүй. Итгэгч нар ч гэсэн бөөн хэрүүл, атаа хорсол, шунал, тачаал.  Пастор хүн ч гэсэн хүүхдийн тоо нэмэгдэх тусам сайхан ааштай эмэгтэйтэй хүртэл хамаг байдгаараа хэрэлдэх юм даа хөө хө хө. Хүн амьдралынхаа турш Бурхантай зөрчилдсөөр яваад сая нэг Есүс Христээр дамжуулан Түүнтэй эвлэрдэг билээ. Харамсалтай нь, сурсан юмыг сураар боож болдоггүй гэдэг шиг бид итгэснийхээ дараа амьдралаа өөрсдийн хүсэл, тааллаар бусад хүмүүсийн адил энэ дэлхийн хэм хэмжээнд авч явах гэж зөрчилддөг байна. Ийм үед итгэгч бид Бурханд захирагдах талаар Иаков сургаж байна.

Та нарын дундах хэрүүл болон зөрчлийн үндэс юу вэ? Тэр нь эрхтнүүдэд чинь дайтаж буй та нарын хүслүүд биш үү?  Та нар шунан хүсдэг бөгөөд та нарт байхгүй болохоор нь хүн алдаг. Та нар атаархдаг бөгөөд олж авч чаддаггүй. Тиймээс та нар тэмцэлдэж, хэрэлддэг. Та нар гуйдаггүй учраас та нарт байдаггүй.  Та нар гуйгаад хүлээн авдаггүй. Учир нь та нар өөрсдийн тааламжид зарцуулъя хэмээн буруу хандлагаар гуйдаг байна. Завхай эмс ээ, ертөнцтэй найзлах нь Бурханы эсрэг дайсагнал гэдгийг та нар мэдэхгүй гэж үү? Тэгэхлээр ертөнцийн найз байхыг хүссэн хэн боловч өөрийгөө Бурханы дайсан болгож байгаа юм. Эсвэл ямар ч зорилгогүйгээр Сударт “Түүний бидний дотор нутаглуулсан сүнс нь атаархан хүсдэг” хэмээсэн гэж та нар бодож байна уу? Гэвч Тэр илүү их нигүүлслийг өгдөг. Тиймээс “Бурхан бардам хүнийг эсэргүүцдэг, харин даруу хүнд нигүүлсэл өгдөг” гэдэг. Тиймээс Бурханд захирагдагтун. Диаволыг эсэргүүц. Тэгвэл тэр та нараас зайлна. Бурханд ойртогтун. Тэгвэл Тэр та нарт ойртоно. Нүгэлт хүмүүс та нар гараа цэвэрлэ. Хоёр санаатай хүмүүс та нар зүрхээ ариусга. Шанал, гашууд, уйл. Инээд чинь гашуудал болог. Баяр хөөр чинь уйтгар гуниг болог. Эзэний оршихуйд өөрсдийгөө даруу болго. Тэгвэл Тэр та нарыг өргөмжлөх болно.

Бурхан ЭЗЭН минь ээ, би Тантай дайсагнаж амьдармаагүй байна. Амьдралаа Таны хүслийн дагуу хамгийн сайнаар эдлэхийг хүсч байна. Таны төрхөөр бүтээгдсэн мөнх амьдрах хувь тавилантай хүмүүсийг Таны хайраар хайрлаж сурмаар байна.  Өөрийн гэр бүл, найз нөхөд болон итгэлийн ах дүү нартайгаа эвтэй байхын тулд Тантай ойрхон байхыг хүсч байна. Зүрх сэтгэлдээ байгаа хуураамч бүхнийг өөрийн бардам зангийн хамт Танд захируулж сурахад минь туслаач. Хуурамч бүхнийг харах нүдийг минь нээж өгөөч гэж би Есүсийн нэрээр залбирч байна. Амен.

• Сорилт, Мат 4:1-11

Амьдрал  өөрөө бодит сайхан сорилтуудаар дүүрэн байдаг тул  хүмүүс бид төрөлхийн шунахай, ханаж цадхыг мэддэггүй амьтад болохоор байнга унаж, бүдэрч явдаг юм болов уу даа. Амьдралаа өөрийн хүслээр авч явах, эд баялаг, хязгааргүй эрх мэдэл гэдэг бол хэн хүний татгалзаад байх зүйлс биш. Өнөөдөр ч гэсэн Сатан эдгээр зүйлсийг шашны бүтээгдхүүн болгон сайхан савлаад хүн төрөлхтөнд олон янзын сувгаар санал болгосоор байгаа боловч эдгээрийн сайн муу, үнэн зөв эсэхийг шалгах Библи, бидний зүрх сэтгэлийг тэтгэх Ариун Сүнс, эцсийн сонголтыг хийх эрх мэдлийг Бурхан бид нарт өгсөн юм.

Есүс диаволд соригдохоор цөл уруу Сүнсээр хөтлөгдөв. Тэр дөчин өдөр, дөчин шөнө мацаг барьсны эцэст өлсжээ. Соригч ирээд, Түүнд -Хэрэв Чи Бурханы Хүү мөн бол энэ чулуунуудыг талх бол гэж тушаа гэв. Гэвч Есүс -”Хүн зөвхөн талхаар бус, харин Бурханы амнаас гарах үг бүрээр амьдарна” гэж бичигдсэн байдаг гэж хэлэв. Тэгэхэд диавол Түүнийг ариун хотод аваачиж, сүмийн орой дээр зогсоогоод, Түүнд -Хэрэв Чи Бурханы Хүү мөн юм бол доошоо үсэр. Учир нь “Тэрээр тэнгэр элч нартаа Чиний талаар тушаана. Чамайг хөлөө чулуунд цохичих вий гэсэндээ  Тэд гар дээрээ Чамайг өргөн явна”  Есүс -”Өөрийн Бурхан Эзэнээ бүү сорь” гэж бас бичигдсэн байдаг гэв.  Диавол дахин Түүнийг асар өндөр ууланд аваачаад дэлхийн бүх хаанчлалыг болон сүр хүчийг нь үзүүлээд, -Хэрэв Чи сөхрөн, надад мөргөвөл, энэ бүхнийг би Чамд өгье гэж  хэлэхэд Есүс -Зайл, Сатан аа! “Чи өөрийн Бурхан Эзэндээ мөргөж, зөвхөн Түүнд үйлчил” гэж бичигдсэн байдаг юм гэж хэллээ.  Тэгээд диавол Түүнийг орхиход, тэнгэр элч нар ирж Түүнд үйлчилж эхлэв.

Бурхан Аав аа, Таны Хүү Есүс Христ бүх талаараа соригдсон боловч гэм нүгэл үйлдэлгүй, бид нарт Таны хүслээр амьдрах бололмжтой гэсэн итгэл, найдварыг үлдээсэнд баярлалаа. Ариун Сүнс ээ, миний өдөр тутмын амьдралд ирдэг жижиг сажиг сорилтуудаас татгалзаж сурахад минь туслаач. Мөн амьдралын томоохон шийдвэрүүдийг гаргахдаа Таны хүслийг Сатаны хууран мэхлэлтээс ялгах чадварыг Өөрийн Амьд Үгс болон итгэлийн ах дүүс нараар дамжуулан надад хэлж байгаарай. Өөрийнхөө амьдралыг Таны мутар болон Таны надад өгсөн итгэлийн гэр бүлийн хүмүүсийн мэргэн ухаанд өргөе. Амен.

• Есүс амьд, Мат 28:1-10

Түүхэнд нэр алдраа үлдээсэн хүмүүсийн дундаас хамгийн агуу нь ямар ч маргаангүй Есүс мөн. Түүнд эд баялаг, эрх мэдэл, албан тушаал байгаагүй.  Харин Тэр хүмүүсийг байгаагаар нь хайрлаж, эдгэршгүй өвчнүүдийг нь эдгээж, бузар сүнснүүдээс чөлөөлж, Бурханы Хаанчлалыг тунхагласан. Тэр хилс хэргээр загалмайд цовдлуулан үхсэн боловч, дахин амилж, тэнгэрт одсон юм. Хоёр мянганы туршид Есүс гэдэг энэ ариун НЭР хүмүүст итгэл, найдвар, хайрыг бэлэглэж, сургаал нь гэмт хүмүүсийн амьдралыг өөрчилсөөр байгаа нь Түүний дахин амилалтын хүч юм.

Амралтын өдрийн дараа долоо хоногийн эхний өдөр үүрээр Магдалын Мариа болон нөгөө Мариа нар булшийг үзэхээр ирэв. Харагтун, маш хүчтэй газар хөдлөлт болжээ. Учир нь Эзэний тэнгэр элч тэнгэрээс буун ирж чулууг зайлуулаад дээр нь суужээ. Түүний дүр аянга лугаа адил хувцас нь цас шиг цагаан байв. Харуулууд түүнээс айн чичирч, үхсэн мэт болжээ. Тэгтэл тэнгэр элч эмэгтэйчүүдэд -Бүү ай. Загалмайд цовдлогдсон Есүсийг хайж байгааг чинь би мэдэж байна. Тэр энд байхгүй. Учир нь хэлж байснаараа Тэр амилсан. Ирэгтүн. Түүний хэвтэж байсан газрыг үзэгтүн. Хурдан очиж, шавь нарт нь “Тэр үхэгсдээс амилжээ. Тэр та нараас түрүүнд Галилд хүрэх тул та нар тэнд Түүнийг харах болно” гэж хэл. Харагтун. Би та нарт хэллээ гэв.

Амьд оршигч ЭЗЭН Есүс минь ээ, үхлийн айдсыг ялж, загалмай дээр  бидний гэм нүглийн төлөөс болон амиа өргөн, бид нарт мөхөшгүй агуу хайраа зориулсанд баярлалаа. Таны үхэл ба дахин амилалт бид нарт итгэл найдварыг төрүүлж, гэм нүгэлтэй бидний амьдралыг ариусгасаар байгаад талархаж байна. Энэ дэлхийн амьдралын бүхий л саад бэрхшээлүүдийг даван туулах дахин амилалтын хүч чадлыг итгэгч хүн бүрт хайрласанд баярлалаа. Үхлээс дахин амилсан Есүс Христийн нэрээр залбирч байна. Амен.

• Бурханыг бүү сорь, Марк 15:25-32

Бурхан итгэдэггүй хүмүүсийн сорилтонд Өөрийгөө хэзээ ч батлаж байгаагүй. Итгэгч хүмүүс ч гэсэн Бурхан ЭЗЭНээ сорьж болохгүй гэдгийг Есүс Христ сургасан. Зөвхөн аравны нэг ба өргөл хандиваар Бурхан Өөрийг нь сорьж болно гэж Малаки 3-р бүлэгт хэлсэн байдаг. Харамсалтай нь, итгэдэг, итгэдэггүй бүх хүмүүс Бурханыг янз бүрийн байдлаар сорьдог. Есүсийг хүртэл сорьж байгаад итгэе гэсэн хүмүүс байсан, одоо ч байгаа. Гэвч тэд Түүний амьдрал, үхэл, дахин амилалтанд итгээгүй, одоо ч гэсэн итгэдэггүй итгэгч нар байсаар байна.

Түүгээр өнгөрөн явагсад Есүсийг басамжлан доромжилж, толгойгоо сэгсрэн -Өө! Сүмийг устгаад гурван хоногт дахин баригч Та  Өөрийгөө авраач! Наад загалмайнаасаа буугаач! гэж байлаа. Мөн түүнчлэн ахлах тахилч нар хуулийн багш нарын хамт Түүнийг элэглэн дооглож, өөр хоорондоо -Тэр бусдыг аварсан. Тэр Өөрийгөө аварч чадахгүй. Израилийн Хаан энэ Христ, одоо загалмайнаасаа буу л даа. Тэгвэл бид хараад, итгэе гэж байв. Есүстэй хамт цовдлогдсон тэр хүмүүс ч мөн адил Түүнийг доромжилж байлаа.

ЭЗЭН минь ээ, бүх Монголчуудын итгэлгүй байдлыг өршөөгөөч. Есүс Христийн талаар ямар ч мэдлэггүй, өөрсдийн мухар сүсэгт автан Таныг сорьж байсан бүх хүмүүсийг \намайг ч мөн адил\ өршөөсөнд баярлалаа. Танд итгэдэг гэдэг боловч итгэлгүй байгаа ахан дүүс нарыг минь уучилж, тэднийг худал бурхдын заль мэх бүхий ид шидийн олон янзын хэлбэрээс хамгаалж өгөөрэй.  Таны Нэрээр дуудагдсан Монгол итгэгч нарын итгэлийг өсгөж өгөөч гэж би Есүсийн нэрээр зуучлан залбирч байна. Амен.

• Бурхан намайг авраач, Дуул 69:1-3

Миний бодлоор Бурханы хүүхдүүд мөнхөд Түүний хүүхдүүд хэвээр үлдэнэ. Гэхдээ энэ дэлхийд амьдарч байхад Сатан бүх зүйлсийг ашиглан биднийг Бурханаас холдуулхыг хичээдэг. Хүний төрөлхийн гэмт чанарууд, нийгэм, сургуул, ажил, шашин, соёл, найз нөхөд болон тэр ч байтугай ар гэрийнхэн хүртэл итгэгч нарыг янз бүрийн байдлаар ЭЗЭНээс хол хөндий, нэр төдий байлгахыг санаархдаг.

Бурхан, намайг авраач. Учир нь их ус аминд минь заналхийлсэн. Би гүн намагт живсэн бөгөөд тэнд хөл тогтох газар үгүй. Би гүн усанд орж, үерт автсан. Би хашхирсаар байгаад ядарчээ. Хоолой минь хатжээ. Би Бурханаа хүлээхэд нүд минь гархилсан.

ЭЗЭН, миний сэтгэлийн дайсан Таны надад өгсөн итгэл, найдвар, хайрыг мөхөөхийг оролдоод байна. Бурхан, намайг авраач. Миний гэмт чанарууд намайг дотроос минь ойр ойрхон өдөөн хатгаад байх юм. ЭЗЭН, Та намайг авраач. Энэ дэлхийн өнгө үзэмж, эд баялаг миний нүдийг булаан сэтгэлийг минь гижигдэж, шунал, хүсэл тачаалыг минь хөдөлгөөд байна. Ариун Сүнс минь, Та намайг ариусгаач, намайг авраач.

• Бурханы амьсгал, Езекиел 37:1-6

Заримдаа надад амьд яваад байгаа мөртлөө амьдрал ямар ч амьгүй, адал явдалгүй мэт санагдах үе гардаг. Амьдрал нэг л хэвийн, эхнэр, хүүхдүүд, сургуул, ар гэр, ажил, санхүү, дэлгүүр, сүм цуглаан гэх мэт бүгд нэг л хэвийн. Бурханы Амьд Үгс хоёр талдаа иртэй сэлэм гэдэгт итгэн, бүхнийг өөрчилнө хэмээн итгэлээрээ тунхаглан залбирсны дараа ямар ч үр дүнгүй мэт санагдаж, миний амьдрал яг л хэвээрээ, ямар ч гал, зориулалт, өөрчлөлт үгүй ёстой энэ үзэгдэлд гарч буй “хувхайрсан яс” шиг харагдах юм.

Тэр надад -Эдгээр яснуудын дээр эш үзүүлж, тэдгээрт “Хувхай яснууд аа, ЭЗЭНий үгийг сонсогтун” гэж өгүүл.  Эзэн БУРХАН эдгээр яснуудад ийнхүү айлдаж байна. “Харагтун, та нар амилахын тулд Би та нар уруу амьсгалыг оруулна. Та нар амилахын тулд Би та нарт шөрмөс хийж, мах ургуулж, та нарыг арьсаар бүрхэж, та нарын дотор амьсгал оруулах болно. Та нар Намайг ЭЗЭН мөн гэдгийг мэдэх болно” хэмээв.

ЭЗЭН, Таны амьсгал амьгүй хүнд жинхэнэ амилалт ба бялхсан амийг өгдөгт баярлалаа. Хувхайрсан яс мэт миний эцэж туйлдаж, амьдралд даруулсан сэтгэлийг сэргээж, зүрхэнд минь Тан руу тэмүүлж байсан анхны хайрын галыг асааж, Ариун Сүнсний гал ба тосолгоог асгаж, миний амьдралыг өөрчлөлт, сэргэлт, зориулалтаар дүүрэн бялхаагаач гэж би Есүсийн нэрээр залбирч байна. Амен.

• Бурханы хүсэл биелэг, Марк 14:32-42

Хүн бүр өөрийнхөөрөө амьдрахыг зорьдог. Хүн болгон өөрийн хүсэл, мөрөөдлөө биелүүлхийн тулд буруу зүйл хийхээс буцдаггүй, тэр ч байтугай хэн нэгэнийг, хэвлийд олдсон хүүхдийг ч хүртэл золиослоход бэлэн байдаг. Хүн бусдад хүлээн зөвшөөрөгдхийн тулд Бурханыг хойш тавьдаг. Үргэлж Бурханыг хүндэлж, Түүний Үгээр ариун бөгөөд зөвт амьдрах боломжгүй хэмээн боддог. Харин Есүс ийнхүү амьдрах боломжтой гэдгийг Өөрийн биеэр харуулсан.

Тэд Гетсемани гэдэг газар ирэв… Есүс ихэд зовж, шаналж эхлэв…Есүс тэдэнд -Сэтгэл минь үхтлээ шаналж байна. Энд үлдээд, сэргэг бай гэв.  Есүс тэднээс жаахан цаашаа яваад, газар унаж, хэрэв боломжтой бол тэрхүү цаг Өөрийнх нь хажуугаар өнгөрсөн байхын тулд залбирав. Есүс -Аав аа, Эцэг минь! Танд бүх юм боломжтой. Энэ аягыг Надаас зайлуулаач. Гэвч Миний хүсэж байгааг бус, харин Та юу хүсэж байгаагаа үйлд гэлээ.

ЗЭЭН минь ээ, би мэдсээр байж, түмэн шалтаг тоочин Таны Үгийг зөрчиж байсандаа гэмшиж байна. Ихэвчлэн би Таны Үгийг биш, харин өөрийн хүслийг эрж хайдаг гэдгээ хүлээн зөвшөөрч байна. Таны Агуу Хайр миний амьдралд хамгийн сайныг хүсч байгаа гэдэгт итгэх итгэл дутаж, өөрийн хүчээр Таны ажлыг хийх гэж зүтгээд үр дүнд хүрсэнгүй. Энэ мөчид миний хүсэж байгааг бус, харин Та юу хүсэж байгаагаа миний амьдралд үйлдээрэй гэж Таны хүслээр бүрэн амьдарсан Есүс Христийн нэрээр залбирч байна. Амен.

• Миний амьдрал Бурханых, Дуул 127:1-2

Хүний бүхий л амьдрал Бурханы гарт атгаастай. Зөвхөн Бурхан хүнд амин амьсгалыг өгч, түүний зүрхийг цохилуулдаг. Хүн эхийн хэвлийд бий болсон мөчөөс эцсийн амьсгалаа гаргах хүртлээ Бурханы агуу хайр, нигүүсэл дор амьдарч байгаад мөнх цаг хугацаатай золгоно. Тийм учраас итгэгч хүн хэзээ ч өөрийн хүч чадал, боловсрол мэдлэг, эд хөрөнгө, залуу насандаа эрдэж, бардамналгүй Бурханы өмнө даруу амьдрах нь чухал.

ЭЗЭН гэрийг барьж байгуулахаас нааш Түүнийг байгуулагчид дэмий хөдөлмөрлөдөг юм. ЭЗЭН хотыг хамгаалахаас нааш Манаач хүн дэмий л сэрүүн байдаг юм. Та нарын хувьд эрт босон, орой болтол унтахгүй байж, зүтгэж олсон талхыг идэх нь дэмий хоосон юм. Учир нь Тэр Өөрийн хайрладаг хүндээ нойрыг өгдөг билээ.

ЭЗЭН, би өөрийн хүч чадлаар биш харин Та миний амьдралыг оргүй хоосноос босгон байгуулж байгаа гэдгийг би хүлээн зөвшөөрч байна.  АНУ-д эхнэр дөрвөн хүүхдийн хамт магистрт суралцаж, Есүс Христийн биед үйлчилж байгаа нь Таны ивээл, ерөөл бас нигүүсэл гэдэгт итгэж байна. Миний гэр бүл, үр удам болон үйлчлэл дээр минь Өөрийн тэнгэрлиг хамгаалалт, мөн хангалтаа цаг үргэлж байлгана гэдэгт итгэж найдан залбирч байна. Амен.

• Би Бурханы хүүхэд, 1 Иох 3:1-3

Хөх толбот Монголчууд нэгэн цагт дэлхийн тэн хагасыг эзэлж явсан Чингис хааны үр удам гэдгээрээ бахархаж, зарим нь агсамнаж явдаг. Малчны хүүхэд аав ээж, гэр бүл, нутаг усаараа бахархдаг бол төрийн өндөр албан тушаалтай сэхээтэн, томоохон бизнес эрхлэгчдийн хүүхдүүд хаана дээд боловсрол эзэмшснээрээ мөн бахархдаг. Зарим хүмүүсийн хувьд бахархаад байх удам угсаа үгүй, эсвэл нийгэмд байр суургүй, нэр хүнд муутай хүмүүс байж болох юм. Харин Есүс итгэгч нар бол Бурханы хүүхдүүд бөгөөд Түүний нэрээр овоглосон хүмүүс мөн.

Бид Бурханы хүүхдүүд гэж дуудуулахаар ямар их хайрыг Эцэг бидэнд соёрхсоныг хараач! Бид бол тийм юм. Иймээс ертөнц Түүнийг мэдээгүй тул биднийг мэддэггүй.  Хайртууд минь, бид одоо Бурханы хүүхдүүд. Бидний ямар байх нь хараахан үзэгдээгүй. Түүнийг үзэгдэх үед бид Түүнтэй адил болно гэдгийг мэднэ. Учир нь бид Түүнийг яг байгаагаар нь харах болно.  Түүнд ийнхүү найдаж байгаа аливаа хүн өөрийгөө цэвэршүүлдэг. Учир нь Тэр цэвэр ажээ.

ЭЗЭН Бурхан минь ээ, намайг хүүгээ болгосонд үнэхээр их талархаж байна. Миний овог нэр, удам угсаа энэ дэлхийд хаа нэгтээ хадан чулуун дээр үлдэх бол миний жинхэнэ нэр Амийн номонд бичигдсэн бөгөөд би Бурханы улсад мөнх амьдрах хувь тавилантай болсондоо баярлаж байна. Таны Хүүгийн цэвэр ариун нэрийг энэ амьдралдаа өндөрт өргөж явхын тулд цэвэр ариун амьдрахыг чин сэтгэлээсээ хүсч байна. Та энэ хүслийг минь биелүүлж өгөөч, амен.

• Есүс ЭЗЭНий тушаал, Иохан 15:9-14

Та бол хайрыг авхын төлөө төрсөн хүн билээ гэдэг нь Есүс эхлээд биднийг байгаагаар минь хайрлсныг магтан дуулж байгаа билээ. Гэхдээ Тэр бид нарыг Түүний хайр дотор бай гэж тушаасан юм. Энэ тушаалыг сахиснаар итгэгч хүн Түүний хайр дотор байгаагаа эргэн тойрондоо харуулна. Түүний хайр дотор байх нь зөвхөн Бурханаар болон итгэгч нараар хайрлуулаад байхыг хэлэхгүй нь ээ. Харин итгэгч хүмүүс нэг нэгнээ байгаагаар нь хайрлаж байж энэ тушаалыг биелүүлж байгаагаа гэрчилнэ.

Эцэг Намайг яаж хайрласан шиг Би бас та нарыг хайрласан. Миний хайр дотор байгтун. Би Эцэгийнхээ тушаалыг сахиж, Түүний хайр дотор байдгийн адил, та нар Миний тушаалыг сахивал Миний хайр дотор байх болно. Би та нарыг яаж хайрласан шиг та нар бие биеэ хайрлагтун. Энэ бол Миний тушаал. Нөхдийнхөө төлөө амиа зориулахаас өөр агуу хайр байхгүй. Хэрэв та нар Миний тушаасныг хийвэл, та нар Миний нөхөд мөн.

Бурхан, Таны хайраар итгэгч ахан дүүсээ хайрлаж сурахад минь туслаачт ээ. Энэ үнэхээр миний хүч чадлаас хэтэрсэн хэцүү тушаал юм аа. Бусдын алдаа дутагдлыг эрэлгүй, үзэн ядал, гомдол, хорсол, шүүмжлэл, ялгавар үзлээ Танд өргөж, ойр байгаа хүмүүсээ одоо байгаагаар нь хайрлах зүрх сэтгэлийг надад өгөөч. Мөн Таны хайраар намайг хайрлахгүй байгаа хүмүүсийг ч гэсэн хайрлахад минь туслаач. Хариу нэхдэггүй хайранд сургаж өгөөч гэж би Есүсийн нэрээр залбирч байна.

• Би ЭЗЭНийг магтана, Дуул 18:1-6

Есүст итгэж, найдаж байгаагийн нэг илрэл бол баяр хөөр, талархал, магтаал, хүндлэлээр дүүрэн амьдрал мөн. Харамсалтай нь, бид өөрсдийн эрхгүй урдаа байгаа асуудлуудыг хараад санаа зовж эхэлдэг. Эсвэл өөрийгөө болон бусдыг буруутгах шалтаг хайж, уурлаж уцаарлаж, гомдоллож, гуниглаж, Бурханд гомдоллож явдаг. Бурханы аврал болон Түүний сайн сайхан зүйлсийг мартчихсан учраас бид ЭЗЭНийг чин сэтгэлээсээ магтан хүндэлж чаддаггүй байна. Харин Давид ЭЗЭНий хийсэн бүх зүйлсийг санаж, үргэлж Түүнд магтаал, хүндэтгэл, талархлыг өргөж байсан нь надад их сургамж болдог.

Миний хүч болох ЭЗЭН, Би танд хайртай. ЭЗЭН бол миний хад, миний цайз, миний аврагч, миний Бурхан, миний хоргоддог хад минь, миний бамбай, миний авралын эвэр,миний бэхлэлт юм. Магтуулах зохистой ЭЗЭНийг би дуудаад, Өөрийн дайснуудаас би аврагдсан. Үхлийн утас намайг хэрж, Бурханлаг бусын цутгалууд намайг айлгажээ. Үхэгсдийн орны утас намайг хүрээлжээ. Үхлийн урхинууд миний өмнө тулгарчээ. Өөрийн зовлондоо би ЭЗЭНийг дуудаж, Өөрийн Бурхан уруу хандан хашхирсанд Тэр Өөрийн сүмээс миний дуу хоолойг сонсож, Түүний өмнө буй хашхирах дуу минь Түүний сонорт хүрсэн билээ .

ЭЗЭН Бурхан минь ээ, намайг Есүст итгэхээс өмнө хайрлаж,  миний амийг хамгаалж ирсэнд талархая. Та намайг гэм нүглийн мөнхийн шийтгэлээс аварсанд их баярлалаа. Та намайг итгэлийн амьдралаар хөтлөн дагуулж, миний алдаа дутагдлуудыг хайраараа халхалж, сургаж, хүмүүжүүлж байгаад баярлалаа. Миний ирээдүй Таны гарт байгаа гэдэгт чин сэтгэлээсээ итгэж, найдаж амьдрахад минь туслаач. Миний зүрхийг баяр хөөрөөр, миний амыг талархлаар, миний амьдралыг магтаал, хүндлэлээр бялхам байлгаж өгөөч. Амен.

• Би Есүсийг гэрчилнэ, 2 Петр 1:16-21

Есүст итгэдэг хүмүүс хэрхэн аврагдсан болон Бурханы амьдралд нь хийж бүхий л зүйлсийг гэрчлэн амьдрах ёстой. Энэ нь зөвхөн пастор, ахлагч эсвэл амжилттай яваа итгээд удаж байгаа хүмүүсийн хийдэг зүйл биш ээ. Харин ч Бурхантай ойрын харилцаатай байгаа хүний амьдралаас аяндаа ундран гарах учиртай. Хамгийн гол нь Бурхан таны амьдралд юу хийж байгаа, эсвэл та юу сурч байгаагаа гэрчлэх явдал юм. Бидний аман гэрчлэл бодит амьдрал дээр үйлсээр батлагдаж байвал их хүчтэй бөгөөд үр нөлөөтэй байх болно.

Петрийн амьдрал Есүс Христийг гэрчилсэн юм. Бид өөрсдийн Эзэн Есүс Христийн хүч чадал болоод Түүний ирэх тухай та нарт мэдүүлэхдээ ухаалгаар зохиогдсон үлгэр домгуудыг дагаагүй, харин бид Түүний сүр жавхланг нүдээр гэрчлэгчид байсан. Учир нь Түүнийг Эцэг Бурханаас хүндлэл ба алдрыг хүлээн авах үед Сүр Жавхлант Алдараас “Энэ бол Миний хайртай Хүү. Түүнд Миний таалал оршдог” гэсэн дуу гарав. Бид Түүнтэй хамт ариун уулан дээр байхдаа тэнгэрээс гарсан энэ дууг сонссон билээ.

ЭЗЭН минь ээ, Таныг сайн гэрчилж чадааггүй намайг уучлаарай. Надаас болж бүдэрсэн итгэлийн ахан дүүсийг минь Та Өөрийнхөө хайр ба амьд үгсээр босгон байгуулж өгөөрэй. Энэ өдрөөс хойш бүх амьдралынхаа турш Таны Хайр, Нигүүсэл болон Үгийг тань тунхаглан, амьдралаараа гэрчилж явахад минь туслаарай. Таны хүү Есүс Христийн нэрээр дуудагдсан хүн бүр Ариун Сүнсээр дүүрэн явж, амьд гэрч байх хүч чадлыг өгөөч гэж залбирч байна. Амен.

• Бурхан бол Гурвал, Лук 3:21-22

Хүний ухаанаар бус зөвхөн итгэлээр хүлээж авах нэг зүйл бол Бурханы Гурвал мөн. Надад үүнийг тайлбарлахдаа ус уур, шингэн ба хатуу мөс гэсэн гурван хэлбэрээр оршдогтой адил гэж тайлбарлаж өгсөн. Харин Библид маш тодорхой, Ард олон бүгдээрээ баптисм хүртэж байх үед Есүс мөн баптисм хүртээд залбирч байх зуур тэнгэр заагдан, Ариун Сүнс биет хэлбэрээр Түүн дээр тагтаа мэт буун иртэл тэнгэрээс дуу гарч -Чи Миний хайртай Хүү. Чамд Миний таалал оршдог гэсэн байна.

Есүс Агуу Захирамж үлдээхдээ, бүх үндэстнийг дагалдагч болгогтун. Эцэг, Хүү, Ариун Сүнсний нэрээр тэдэнд баптисм хүртээ гэж хэлсэн нь Гурвалыг ярьж, зааж байсан гэдэг нь илэрхий байна. Гурвал гэдэг үг Библид гардаггүй ч гэсэн энэ ойлголт маш тодорхой байдаг бөгөөд энэ бол Христитгэлийн үндсэн ухагдхуун мөн. Нэг Бурхан Аав, Хүү, Ариун Сүнс гэсэн Гурван хүнээр Өөрийгөө хүн төрөлхтөнд илэрхийжээ.

Бурхан Аав аа, Хүүд тань итгэсэн намайг Өөрийн гэр бүлдээ хүүхдээ болгон үрчлэн авч, Есүстэй хамт Таны мөнхийн хаант улсыг өвлөн залгамжлах эрхийг өгсөнд баярлалаа. Ариун Сүнс ээ, гэмтэй надад мөнхийн амьдрал хэрэгтэй гэдгийг минь ухааруулж, аврал зөвхөн Христ Есүс дотор өгөгдсөн гэдгийг харах нүдийг нээж, миний амьдралын турш намайг бүх үнэнд дагуулж, миний сүнсийг өдрөөс өдөрт шинэчилж байдагт талархая. Халелюя.

• Зүрхээ бүү хатуу болго, Евр 4:1-11

Бурхан хүнийг долоо хоногт нэг өдөр амарч, хамтаараа цуглаж, Түүнийг хүндэлж байхаар бүтээсэн. Энэ нь хүний амьдралд сүнс, сэтгэл, бие махбод гээд бүх талаараа ач холбогдолтой. Долоо хоногт нэг өдрийг Бурханд зориулахгүй байхаар хүний амьдралын хэмнэл, тэнцвэрт байдал алдагдхаас гадна Бурханаас хөндийрч, Түүнтэй дотны харилцаагүй болдог аюултай. Амралтын өдрөөр дамжуулан Бурхантай мөнх хамт өнгөрөөх амралт руу орох тухай Библийн энэ хэсэгт өгүүлж байна.

Иймд тэр амралтад орох зарим хүмүүс үлдсэн бөгөөд урьд нь сайн мэдээг сонссон хүмүүс дуулгаваргүйгээсээ болж тийшээ орж чадаагүй учир, “Хэрэв өнөөдөр та нар Түүний дууг сонсох аваас, зүрхээ бүү хатуу болго”… Иймд дуулгаваргүй байхын жишээгээр хэн нэгэн маань уначихгүйн тулд тэрхүү амралт уруу орохыг хичээцгээе.

ЭЗЭН минь ээ, Та долоо хоногийн Амралтын өдрөөр дамжуулан надад хожим ирэх мөнхийн амралтын тухай сургаж байгаад баярлалаа. Мөнхийн амралт руу орсон хүмүүс долоо хоногийн Амралтын өдрийг сахиснаар Бурханд итгэж байгаагаа харуулдаг гэдгийг би ойлголоо. Бурхан минь ээ, Амралтын өдрийг шашинлиг биш, харин үнэн утгаар нь Тантай харилцаатай байж, өнгөрүүлж сурахад минь туслаарай. Амралтын өдрөөр Таны хүчээр бие махбод, сэтгэл, сүнсээ сэргээж, оюун бодлоо өөрчилхөд минь туслаарай. Амен.

• ЭЗЭН бол Хангагч, Марк 6:30-42

Хүний хүсэл, мөрөөдөлд хязгаар гэж үнэхээр байхгүй. Орчин үед хэрэв бид хангалттай итгэж чадвал сайн Бурхан бидний бүх хүслийг хангаж өгнө гэсэн сургаал олныг их татаж байгаа. Харамсалтай нь, Бурхан бидний төрөлхийн шунахай хүслийг биш, харин бидний үндсэн бодит хэрэгцээг хангаж өгнө гэж амласан. Тэр, “Бид юу идэх билээ?”, “Юу уух билээ?”, эсвэл “Юу өмсөх билээ” гэж бүү санаа зов. Харин эхлээд Түүний хаанчлал болон Түүний зөвт байдлыг хайгтун. Тэгвэл энэ бүхнийг та нарт нэмж өгөх болно.

Есүс эрэг дээр гарахдаа, үй олон хүнийг хараад тэднийг өрөвдөв. Учир нь хүмүүс хоньчингүй хонь мэт байв. Тэр тэдэнд олон зүйлийг зааж эхлэв. Есүс Бурханы хаанчлал ба үнэнийг хайсан хүмүүст эхлээд сүнсний хоолыг өгөөд, дараа нь тэдний махан биеийг хоолосон байна. Есүс таван талх, хоёр загасыг авч, тэнгэр өөд ширтэн хүнсийг ерөөгөөд талхыг хувааж, хүмүүст өгүүлэхээр шавь нартаа өгөв. Хоёр загасыг ч бүгдэд нь хуваан хүртээв.  Тэд бүгд цөмөөрөө идэж цадсан байлаа.

ЭЗЭН минь ээ, “Хүн зөвхөн талхаар бус, харин Бурханы амнаас гарах үг бүрээр амьдарна” гэдэг үгэнд итгэж амьдрахад минь туслаач. Тантай харилцаатай байж, сүнснээ хоолон, Таны сургаалын дагуу амьдарч байхад Та энэ амьдралын бодит хэрэгцээнүүдийг хангаж өгнө гэсэн амлалтанд тань чин сэтгэлээсээ итгэж, зөвхөн Танаас ирж буй амьд үгсийг амьдралдаа оруулж, Таны гайхамшигтай хангалтуудаар амьдармаар байна. Амен.

• Би ЭЗЭНийг хүлээнэ, Исая 40:27-30

Миний зам ЭЗЭНээс нуугдаж, үйлсийг минь миний Бурхан мартсан гэж хэлмээр үе надад зөндөө байсан. Ялангуя, ар гэр, найз нөхдөөсөө хол, таньж мэдэх хүн цөөн харийн нутагт бага насны дөрвөн хүүхэдтэй амьдарч, магистрт сурч, хажуугаар нь үйлчилж байгаа сүүлийн 3-4 жил их амаргүй байна даа. Бурхан надтай хамт байгаа гэдгийг мэдээд байгаа атлаа Тэр намайг “цөл”-д авчраад хаячихсан мэт санагдаад байх юм.

Мөнхийн Бурхан болох ЭЗЭН дэлхийн хязгаарыг Бүтээгч нь эцэж туйлддаггүй юм. Түүний ухаан нь хязгааргүй. Тэр ядарсанд тэнхээ өгч, чадал дутагдсанд нь хүч нэмдэг. Залуу хүн ч ядарч сульдан, идэр хөвгүүд ч бүдэрдэг. Харин ЭЗЭНд найдагчдын хүч нь шинэчлэгдэнэ. Тэд бүргэд мэт жигүүр дээрээ элин халина. Тэд гүйхдээ үл ядран, алхахдаа үл цуцна гэдэг үгс надад итгэл, найдварыг өгч байна.

ЭЗЭН, надад ачаагаа үүрэх хүч чадлыг зөвхөн Та өгсөөр байгаа гэдэгт би зүрхэндээ итгэж байна. Би биш, харин Та миний дотор амьд байж, надад хүчийг өгч байгаа. Одоо би Танд итгэж, Таныг хүлээж, Танд найдаж, хүчээ шинэчлүүлмээр байна. Надад Таныг хүлээх тэвчээр бас итгэлийг өгөөч гэж би гуйж байна. Учир нь надад итгэл бас тэвчээр дутснаас болж хамаг хүчээрээ зүтгэсээр байгаад эцэж туйлдаж, ядраад байна.

• Би ЭЗЭНд хайртай, Дуул 116:1-7

Хүн хүнээ хайрлаж, хайрлуулхын төлөө амьдардаг. Миний хувьд намайг төрүүлж, хайрлаж, халамжилж өсгөсөн ээж, ах, эгч нартаа хайртай. Би бас эхнэр, хүүхдүүддээ маш их хайртай. Би дөрвөн хүүхдээ яг адилхан хайрладаг. Эхнэртээ үхэл биднийг салгатал хайрлаж, хамт амьдарна гэсэн амлалтаа биелүүлнэ гэж би боддог. Мөн үйлчилж байгаа Лос Анжелесийн Монгол Сүмийн бүх хүмүүс болон Амьд Үгсийг өдөр бүр уншдаг хүмүүсийг Бурханы Хайраар хайрлаж, та нартаа сайн сайхныг хүсэж, та нарын төлөө залбирч явдаг шүү. Итгэгч хүн эхлээд Бурханыг хайрлаж сурвал Түүний дүрээр бүтээгдсэн хүнийг хайрлаж сурдаг юм байна.

Би ЭЗЭНд хайртай. Учир нь Тэр миний дуу хоолойг, гуйлтыг минь сонсдог.
Тэр намайг чих тавин сонсдог учраас би амьд байх хугацаандаа дуудах болно.
Үхлийн уяа намайг ороож, үхэгсдийн орны аймшгууд над дээр иржээ.
Би зовлон зүдгүүр хийгээд уй гашуутай ч учирсан.
Тэгээд би ЭЗЭНий нэр дээр дуудан “Өө, ЭЗЭН, би Танаас гуйя, амийг минь авраач!” гэв.
ЭЗЭН бол нигүүлсэнгүй ба зөв шударга. Тийм ээ, бидний Бурхан бол өрөвч.
ЭЗЭН гэнэн цайлган хүнийг хамгаалдаг. Намайг дорд болоход Тэр намайг аварсан.
Сэтгэл минь ээ, эргээд амар тайван бол доо. Учир нь ЭЗЭН чамд их өгөөмөр хандсан юм.

Бурхан минь, бүх хүмүүсийг хайрлаж байгаа агуу хайранд тань талархая. Та намайг шийтгэж, мөхүүлхийг хүсээгүй учраас Өөрийн Хүү Есүс Христийг миний эдлэх ёстой байсан мөнхийн шийтгэлийн оронд золиос болгон өргөсөн хайрыг тань би ухаарч байна. ЭЗЭН Таныг хайрлаж сурахад минь туслаач. Амьсгал авах бүрдээ Тантай хайрын амьд харилцаатай амьдарч, Таны хайраар эхнэр, хүүхдүүдээ болон Таны нэрээр дуудагдсан хүмүүсийг хайрлаж, үйлчлэх хүч, мэргэн ухааныг бялхаагаач гэж би Есүсийн нэрээр гуйж байна. Амен.

• Есүст итгэж амьдрах нь, Мат 11:25-30

Бүх хүн өөр өөрийн гэсэн асуудал, дарамт, зовлон үүрч явдаг бөгөөд бүгдээрээ л амар тайван, элэг бүтэн, хангалуун сайхан амьралыг хүсч, мөрөөдөж, тэмцэж амьдардаг. Есүс ийм амьдралыг туулсан учраас хүмүүст хандан, Эцэж туйлдсан, хүнд дарамт үүрсэн хүмүүс ээ, бүгд Над уруу ир. Би та нарыг амраая. Буулгыг минь өөр дээрээ авч, Надаас суралц. Учир нь Би зүрх сэтгэлдээ дөлгөөн, даруу билээ. Тэгээд та нар сэтгэлдээ амралтыг олох болно. Миний буулга амархан, Миний ачаа хөнгөн гэв.

Есүс надтай үргэлж хамт байж, миний бүх асуудлуудыг үүрч явжээ. Тэр намайг төрөхөд аав минь болж, баяртайгаар угтаж авсан.  Жил бүр Тэр л  миний төрсөн өдрийг надад сануулж байсан.  Хүүхэд насандаа хөлдөж үхэх, үерийн усанд живэх, автын осолд амь насаа алдах аюулуудаас амьд үлдсэн нь зөвхөн Түүний хүсэл байжээ. Намайг Өөрт нь итгэдэггүй байхад Тэр намайг байгаагаар минь хайрласан байна. Ачмаа бид хоёрыг гэр бүл болоход Тэр адислаж, бид хоёрыг дөрвөн хүүхдээр ерөөсөн. Сүүлчийнхээ амьсгалыг гаргах мөчид Тэр намайг угтана гэдэгт би итгэж амьдардаг. Тэгээд миний дараа миний эхнэр, үр хүүхдүүдийг минь Тэр харж, хамгаална гэдэгт би итгэдэг.

ЭЗЭН минь ээ, надтай үргэлж хамт байгаа Таныг дандаа мэдэрч, Тантай харилцаж амьдрахад минь туслаарай. Зөвхөн хүнд хэцүү үедээ ч биш, аз жаргалтай, баяр хөөртэй үедээ Таныг мартахгүй байхыг минь сануулж байгаарай. Амьдралынхаа том жижиг бүхий л асуудлуудаа Тантай хуваалцаж, Таны сургаалын дагуу шийдэж, чадахгүй бүхнээ Танд өргөж, хүнд хэцүү, зовлонтой, ганцаардсан үедээ зөвхөн Танд итгэл найдвараа тавьж, уур уцааргүй, санаа зоволгүй амар тайван байж сурахад минь туслаач гэж залбирч байна. Амен.

• Бурхан шийтгэдэг, Иер 6:6-16

Итгэгч нар Бурханы хайр, уучлалын тухай их ярьдаг бөгөөд сонсох дуртай боловч Түүний хайрын талаар бүрэн мэдлэггүй явдаг. Бурхан бол хартай бөгөөд Түүний хайр хатуу байдаг тухай Библи их өгүүлдэг. Бурхан Иерусалимыг яагаад шийтгэх болсон шалтгаануудаа Иеремиа гэдэг хүнээр хэлүүлэхдээ, Түүний моддыг огтолж, Иерусалимыг бүсэл. Дунд нь зөвхөн дарлал байдаг энэ хот шийтгэгдэх ёстой юм. Худаг усаа цэвэр байлгадгийн адил тэрээр өөрийн хорон муу явдлаа шинэхэн байлгадаг. Хүчирхийлэл болон сүйрэл түүний дотор сонсогддог. Өвчин болон шархнууд Миний өмнө ч байна. Учир нь тэд багаасаа том хүртэл бүгд ашиг олох гэж шунадаг бөгөөд эш үзүүлэгчээсээ тахилч хүртэл хүн бүр хуурамч байна.

Харамсалтай нь Бурханы хүүхдүүд Түүнийг үл ойшоож, гэмшдэггүй тул шийтгэлийг нь бүрэн эдэлдэг. Сонсгохын тулд би хэнд хэлж, сануулга өгөх юм бэ? Үзэгтүн, тэдний чих таглагдсан бөгөөд тэд сонсож чадахгүй. Үзэгтүн, ЭЗЭНий үг тэдэнд зэмлэл болов. Тэд түүнийг таашаасангүй. Тэд өөрсдийн үйлдсэн жигшүүрээсээ болж ичсэн үү? Тэд харин ч огт ичсэнгүй. Тэд яаж улайхыг ч хүртэл мэдэхгүй байв. Тиймээс тэд унагсдын дунд унана. Би тэднийг шийтгэх үед тэд хаягдах болно” гэж ЭЗЭН айлдаж байна.

ЭЗЭН, Та намайг буруу замаар явж, амьдралаа үрэн таран хийж, унагсдын дунд байхаас хамгаалхын тулд шийтгэдэгт баярлалаа. Таны эсрэг гэм нүгэл үйлдсэн намайг уучилж, зөвт бус байдлаас минь цэвэрлэж өгөөч. Таны шийтгэлийг тэсвэрлэж, сургамжийг тань хүлээж авах мэргэн ухааныг өгөөрэй. Таны сануулгыг цаг тухайд нь сонсож, Библийн сургаалын дагуу амьдрах сонголт хийх хүч надад хэрэгтэй байна. Та надтай үргэлж хамт, дандаа тусална гэж амласанд баярлалаа. Таны шийтгэл хүртэл хайр дотор өлгийтэй байдагт баярлалаа.