Авахаасаа өгөх нь илүү ерөөлтэй гэж Паул зөвхөн мөнгөний талаар яриад зогсохгүй, мөн өөрийн туулж өнгөрүүлсэн Христитгэлт амьдралыг дүгнэж хэлж байна гэлтэй. Энэхүү зарчим хүний амьдралын санхүүгийн талбарт үйлчилхээс гадна гэр бүл, үр хүүхэд болон сүнс, сэтгэл, зан чанар гээд хүний амьдралын бүх талбарт адил нөлөөлдөг. Бидний ЭЗЭН Есүс энэ зарчмын дагуу амьдарсан бөгөөд энэ тухай нэг биш удаа зааж байсан нь Библид бичигдсэн байдаг.

Нөгөө талаас бидний төрөлхийн зан чанар болон энэ дэлхий эсрэг талыг нь заадаг бөгөөд “өгөхөөсөө авсан нь хождог хорвоо”  мэтээр ухаж суртачилдаг. Энэ бол материаллаг үзэл. Хэрэв бидний итгэл үнэхээр мөнх амьдралд итгэдэг бол дээрх зарчим илүү утга учиртай санагдана. Үүнд итгэж амьдарвал бид энэ амьдралдаа ерөөгдөөд зогсохгүй, мөн мөнх амьдралдаа ч илүү ерөөгдөнө.

Авахаасаа өгөх нь илүү ерөөлтэй гэж үнэн үү? Энэ зарчим таны амьдралд хэр бодитой үйлчилж байна вэ?  Тодорхой жишээ татна уу?

Элч Паул Эфэс хотын чуулгануудын ахлагч нарт сүүлийн захиасаа үлдээж, дахиад уулзахгүй тул сэтгэл хөдлөм байдлаар хагацаж байна. Гол нь өөртөө болон Ариун Сүнсний харгалзуулхаар өгсөн сүргүүдэд анхаарал тавьж, гадна, дотноос ирэх худал сургаал заагчдаас сонор сэрэмжтэй бай гэжээ. Гэхдээ хамгаас илүү Бурханы нигүүлслийн үгэнд даатгаж байгаа нь тэдгээр ахлагчдыг цаашид  амжилттай явуулах гол хүчин зүйл бол Бурханы Үг гэдгийг онцолж байна.

Өнөөдөр Үгийн үйлчлэл хийдэг ахлагч хийдэг хүн нэг бүр Бурханы Үгийг зөв заах хариуцлага хүлээсэн тул зөв сургаал заахын тулд өөрийгөө Үгийн үйлчлэлд сайн бэлдэх ёстой. Бусад пасторуудын сургаалыг өөрийн болгоод хуулаад байх нь сайн биш. Хамгаас илүү буруу сургаалыг ялгаж чаддаг байх учиртай. Христийнхний дунд дэлгэрээд байгаа буруу сургаалуудаас зайлсхий. Энэ итгэгч хувь хүмүүст ч гэсэн хамаатай. Итгэгч хүн бүр Бурханы өмнө шүүлгэнэ гэдгийг мартаж болохгүй. 

•   Өнөө үеийн өргөн дэлгэр тархаад байгаа буруу сургаалууд юу вэ?
  
•  Та үнэн зөв сургаалыг худал буруугаас хэрхэн ялгадаг вэ?
  
•  Та Бурханы Үгийг хэрхэн судалж байна вэ?
  

Өөрийнх нь очих хот бүрд хүлээс болон зовлон хүлээж байгаа гэдгийг Ариун Сүнс илчисээр байхад Паул тухайн Сүнсэнд дуулгавартай захирагдсаар Иерусалим руу яюж байв. Ийнхүү үг дуугүй дуулгавартай байх гол шалтгаан нь Бурханы нигүүлслийн сайн мэдээг гэрчилж, Түүний бүхэл төлөвлөгөөг мэдүүлэх гэсэн зорилго байжээ. Паулын амьдралын зорилго нь эд хөрөнгө, нэр алдар байсангүй. Харин тэр амьдралынхаа эцэс хүртэл Сайн мэдээг тунхаглах зорилгодоо үнэнч хэвээр байсан юм.

Бурхан нэг ч хүнийг мөнхийн тамд битгий унаасай, бүх хүн Түүний өмнө гэмшиж, мөнх амьтай болоосой гэж хүсдэг. Тийм ч учраас Өөрт нь итгэдэг хүн нэг бүрийг Сайн мэдээг дэлгэрүүлж, хүний төлөө гэсэн Түүний бүхэл төлөвлөгөөг мэдүүлээсэй гэж хүсдэгт би итгэдэг. ЭЗЭН танаас ийм зүйлийг хүсч байгаа гэдэгтэй та санал нийлэх үү? Таны амьдралын эрхэм зорилго юу вэ?

Паул хэрхэн хаагуур ямар зорилготой явдаг байсныг 20,21 ишлэлдүүдэд хэлсэн байна. Түүний нийтэд болон айлаас айлд сургаж байсан сургаалын гол нь Бурханы өмнө гэмших гэмшил, бидний ЭЗЭН Есүс Христэд итгэх итгэл байжээ. Энэ бүхний төлөө Паул хавчлага, зовлон, зүдгүүрийг тэсвэрлэдэг байв. Тэгхээр Үгийн үйчлэл хийж байгаа хүмүүсийн гол ярих зүйлс нь тодорхой байна.

Харамсалтай нь, олон итгэгч нар дээрх зүйлсийг дахин дахин сонссоор байгаад мэддэг болчихслн тул анхан шатны сүүн тэжээл гэж ойлгодог. Тиймд тэд шинэлэг сургаал хүсдэг талтай. Үнэндээ шинэ сургаал гэж байхгүй харин дамжуулж байгаа хэлбэр нь өөрчлөгдхөөс, Сайн Мэдээний агуулга хэзээ ч өөрчлөгдөх ёсгүй юм. Итгэгч хүн хичнээн жил ч болсон бай Бурханы өмнө гэмшсээр байж, бүх амьдралынхаа туршид Есүс Хрстэд Аврагч ба ЭЗЭН хэмээн итгэсээр байх ёстой. 

1. Таны хувьд сургаалын гол цөм нь юу байх ёстой гэж үздэг вэ?
   
2. Христитгэл гэж хэнд, хэн гэж итгэхийг хэлэх вэ?
   
3. Та хэр ойрхон Бурханы өмнө гэмшдэг вэ?-
   

Эфэст болсон үймээн намжсны дараа Паул дагалдагчдыг эрчимтэй урамшуулж, сургаж, ятгасаар байв. Иүдейчүүд түүний эсрэг хуйвалдаан зохиож байсныг хүртэл мэдээд Тройд ирж, тэндээ долоо хоносон байна. Харин эхний өдөр буюу Бүтэн сайн өдөр цуглаан хийж, тэр нь шөнө дунд хүртэл үргэлжилсан тул нэгэн залуу зүйрмэглэж байгаад хоёр давхраас унан нас барсан боловч ЭЗЭН Паулаар дамжуулан түүнийг амилуулсан байан. Юутух гэгч үнэхээр азтай залуу юм.

Амилалтаас илүү Паулын эрчимтэй үйлчлэл болон тухай үеийн итгэгч нарын амьдрал ямар эрсдэлтэй бөгөөд итгэлээр дүүрэн гал халуун байсныг олж харах нь зүйтэй. Тэдний Зоогийн ширээний ар дахь гэр бүлсэн байдал, амь нэгтэй байдал, мөн ЭЗЭНий Үгэнд цангамал байдлыг харж байна. Бурханы хүмүүс эв нэгдэлтэй байхад Тэр тэдний дунд гайхамшигт байдлаар ажилладаг гэдэгт итгэлтэй байна. 

1. Юутух шиг үхээд, тур даруй аимлсан түүх та сонссон уу? 2. Бурхан яагаад түүнийг амилуулсан юм бол?     3. Бурхан яг одоо та нарын дунд юу хийж байна вэ?

Эфэс хотод сүнсний их сэргэлт болсон тул хүмүүс хүний гараар бүтээгдсэн худал бурхдаа шатаан, шүтэх нь бүү хэл, тэдэнд мөргөхөө больсноос болж хэсэг хүмүүсийн ашиг орлого хаагдахад хүрчээ. Хиймэл бурхад, шүтээнүүд нь тэдгээрийг үйлдвэрлэдэг хүмүүсийн орлогын эх үүсвэр болдог бол асар их хөрөнгө мөнгөөр босдог бурхад тухайн шашиндаа бүр ч илүү орлого оруулдаг байна. “Хүний гараар хийсэн бурхад нь бурхад биш” хэмээн онч мэргэн бөгөөд маш зөв хэлсэн байна.

Харин 37-р ишлэлд,  Та нарын авчирсан эдгээр хүмүүс чинь ч сүмийг цөлмөөгүй, охин тэнгэрийг маань ч ер доромжлоогүй юм байна гэж бичигдсэн нь гал халуун цустай Христитгэлтэй хүмүүст сургамжтай бөгөөд анхаарвал зохих зүйл мөн. Олон шашны үзэлтэй хүмүүс холилдон амьдардаг болсон өнөө үед бусад хүмүүсийн эд зүйлсийг шатааж устгах нь сайн үр дүнд хүргэдэггүй. Харин хүмүүс өөрсдөө сайн дураараа худал бурхдаасаа салж, шатаах хэмжээнд ухуулж, сэнхрүүлэх нь бидний үүрэг мөн.

1. Хиймэл шүтээн үйлдвэрлэх нь хэнд ашигтай вэ?
   
2. Та урьд нь хэдий хэмжээний мөнгийг хиймэл бурхдад зориулсан бол?
3. Та урьдын шүтэж байсан хиймэл шүтээнүүдээ устгаж чадсан уу?
   

Эфэс хотод жинхэнэ сэргэлт болсон байна. Шинээр итгэсэн хүмүүс хэрэглэж байсан ид шидийн зүйлсээ зараагүй, харин шатааж устгасан байна. Тавин мянган мөнгөн зоос нь тухайн үеийн ханшаар 50,000 ажлын өдрийн хөлс байв. Ийи агуу зүйл хоёрхон жилийн өмнө 12 хүн Ариун Сүнсний баптисм хүртснээр эхэлсэн гэж үзэж болно. Харин хоёр жилийн турш дагалдагчид ЭЗЭНий Үгэнд суралцаад зогсохгүй,, амьдрал нь өөрчлөгдсөөр тухайн хотдоо нөлөөлөхуйц хүч болж чаджээ.

Хэрэв өнөөдөр ямар нэгэн хот суурин газар амьдарч байгаа бүх итгэгчид бурханлиг бус байдлаасаа бүрмөсөн эргэвэл яах бол? Хэрэв бүх итгэгчид эв нэгдэлтэй байвал нийгэмд хэр нөлөө үзүүлэх бол? Эсвэл бүх итгэгчид ЭЗЭНдээ долоо хоногийн нэг өдрийнхөө хөлсийг өргөвөл сүм нийгэмдээ юу хийж чадах бол? Эсвэл итгэгчид долоо хоногийн нэг өдрийг ЭЗЭНд бүрэн зориулдаг бол амьдрал нь хэр өөрчлөгдөх бол?

1. Сэргэлт гэж юуг хэлэх вэ?
   
2. Сэргэлт ямар хэмжээнд хүрч байж нийгэмдээ нөлөөлөх бол?
   
3. Хувь хүний сэргэлт юунаас эхлэх вэ?  

Паулын хийж байсан бүхнээр ЭЗЭН Есүсийн нэр алдаршиж байсныг энд онцлон харуулж байна. Харамсалтай нь, өнөөдөр ЭЗЭНий нэрээр гайхамшиг үйлдэх, эсвэл эдгээх, зөгнөх, мэдлэгийн үгсийг хэлдэг хүмүүсийн нэр алдаршдаг. Тэр хүн эдгээдэг, эсвэл эш үзүүлж, “үг” хэлдэг гэх мэтээр ЭЗЭНд очих ёстой алдрыг мөхөс сул дорой үйлчлэгч нарт нь оноож, Бурханыг гэхэээсээ илүү тэдгээр хүмүүсийг биширч, шүтдэг талтай. Ийм байдал эргээд тухайн үйлчлэгчийг буруу зам руу хөтөлж, нэр алдрын төлөө хөөцөлдөх, бардам болох эсвэл Ариун Сүнсний биш энэ дэлхийн болон хүний арга замаар үйлчлэхэд хүргэдэг байна. 

1. Хэвлэл мэдээллээр гараад байгаа гайхамшгууд ЭЗЭНийг алдаршуулдаг уу?
   
2. Танай сүм чуулганд Есүсийн нэр алдаршиж байна уу?
   
3. Таны үйлчлэлээр дамжуулан ЭЗЭН алдаршиж байгаа юу?    

Паулыг Эфэс хотод Бурханы Үгийг тунхаглаж эхлэхэд эхний гурван сарын турш олон хүн хүлээн аваад баяртай байсан бололтой. Харамсалтай нь удалүй тэдний заримынх нь зан хувирч, Христийнхнийг муулж, дуулгаваргүй, зөрүүдэлж эхэлсэн байна. Паул Есүсийн дагалдагчдыг хэл амнаас хол, тусад нь авч хоёр жилийн турш сургасан байна.

Бурханы Үг  хоёр талтай илднээс хурц байдаг бөгөөд хүний зүрхний бодол ба санааг хүртэл шүүдэг учраас гэмт амьдралаасаа салах хүсэлгүй хүмүүст үнэхээр хатуу сонсогддог тал бий. Тийм хүмүүс Христийн сүм болон итгэгчдийг муучилж, хов жив ярьдаг. Сүнсээр өссөн жинхэнэ дагалдагч хов ярианд автахгүй, оролцохгүй харин ч Үгэнд суралцсан хэвээр байвал Бурханы Үг түгэн тархсаар байхыг энд харуулж байна.

1. Сүүлийн үед хэн нэгэн танд хов живийн шинж чанартай зүйл ярьсан уу?
2. Тухайн хов яриа танд ямар нөлөө үзүүлсэн гэж та дүгнэж байна вэ?
   
3. Та Бурханы Үгнээс тогтмол суралцаж байгаа юу?     

Есүс Христ ирэх болно гэж сургаж байсан Иоханы сургаалд итгээд, усан баталгаа хийлгэсэн хүмүүс одоо болтол Есүс ирээд, загалмай дээр нас бараад, үхлээс амилаад тэнгэрт гарсан, мөн амлагдсан ёсоор Ариун Сүнс итгэгч нарын дээр буусан гэдгийг сонсоогүй, сонссон ч хүлээн авч итгээгүй байжээ. Харин элч Паул энэ тухай яриад, гар тавин залбирахад Ариун Сүнс ирж, тэнд байсан 12 хүн олон янзын хэлээр ярьжээ гэж бичигдсэн байна. 

Өнөөдөр ч гэсэн Ариун Сүнсний ажлуудыг хардаггүй, харсан ч хүлээн зөвшөөрдөггүй итгэгчид байдаг. Ийм хүмүүс зөвхөн өөрсдийн итгэл, зүтгэл болон сайн үйлс, үйлчлэлдээ итгэдэг бололтой. Эсвэл усан баталгаа хийлгэсэн бол боллоо, сүмд явж байхад л хангалттай гэсэн байдлаар хязгаарлагдах маягтай. Харин гэмээс ангид амьдрах ятгалга, Бурханд бүх амьдралаа зориулах, Үгэнд дуулгавартай амьдрах гэх мэт Ариун Сүнсний ажлуудад хаалттай явсаар байдаг.

1. Та Ариун Сүнс гэж хэн болох талаар хэр сайн мэдэх вэ?
   
2. Ариун Сүнс таны амьдралд юу хийж байна вэ?
   
3. Та Ариун Сүнсний удирдлаганд хэр дуулгавартай байгаа вэ?